Në bisedën telefonike të mërkurën, kryediplomatët e Türkiye-s dhe Katarit përsëritën denoncimin e tyre për provokimin e djeshëm në Xhaminë Al-Aksa nga ministri i ri izraelit i Sigurisë Kombëtare, transmeton Anadolu Agency (AA).
Sipas deklaratës së Ministrisë së Punëve të Jashtme (MPJ) të Türkiye-s, ministri Mevlüt Çavuşoğlu dhe homologu i tij i Katarit, Sheikh Mohammed bin Abdulrahman Al Thani, diskutuan mbi “bastisjen e së martës në Xhaminë Al-Aksa dhe zhvillimet e fundit në Siri dhe Afganistan”.
“Gjatë bisedës telefonike, ministrat përsëritën dënimin e tyre në lidhje me aktin provokues të Itamar Ben-Gvir, ministrit të Sigurisë Kombëtare të Izraelit, dje në xhaminë Al-Aksa”, thuhet në deklaratë.
Duke shtuar se të dy zyrtarët shkëmbyen gjithashtu pikëpamje mbi zhvillimet në Siri, thuhet se Çavuşoğlu dhe Al Thani shprehën “shqetësimin e tyre të ndërsjellë në lidhje me ndalesën e fundit të qeverisë afgane (talebane) për qasjen e grave në arsim dhe përjashtimin e tyre nga fusha të caktuara të punës në Afganistan”.
Çavuşoğlu gjithashtu “përgëzoi homologun e tij për organizimin e suksesshëm të Kupës së Botës FIFA 2022 në Katar”. Forcat turke ndihmuan gjithashtu në ofrimin e sigurisë gjatë ngjarjes, kupa e parë botërore e organizuar nga një vend musliman dhe arab.
Të martën, pavarësisht paralajmërimeve se një veprim i tillë do të ngjallte trazira, ministri izraelit i Sigurisë Kombëtare, Itamar Ben-Gvir, vizitoi kompleksin e Xhamisë Al-Aksa.
Al-Aksa për muslimanët paraqet vendin e tretë më të shenjtë në botë. Hebrenjtë, nga ana e tyre, kësaj zone i referohen si Mali i Tempullit, duke pretenduar se në kohët e lashta aty ndodheshin dy tempuj hebrenj.
Izraeli pushtoi Kudsin Lindor gjatë Luftës Arabo-Izraelite të vitit 1967 dhe aneksoi të gjithë qytetin në vitin 1980, në një lëvizje që nuk u njoh kurrë nga komuniteti ndërkombëtar.
