Kryetari i Lidhjes Demokratike të Kosovës, Lumir Abdixhiku, shpreh mirënjohje dhe falënderime me për të gjithë mësuesit e mësueset të cilët kanë kontribuuar dhe kontribuojnë në edukimin dhe përparimin e shoqërisë sonë.
Këto mirënjohje ai i drejton mësuesve me rastin e 7 marsit që shënohet si Dita e Mësuesit.
Ndërsa uron, Abdixhiku, shprehet se Dita e Mësuesit kujton rëndësinë që kanë mësimdhënësit në ndërtimin e një shoqërie të drejtë, të përparuar dhe të qëndrueshme.
“Të gjithë mësimdhënësve, urime 7 marsi, Dita e Mësuesit! Në këtë ditë dhe jo vetëm, kujtojmë rolin dhe kontributin e jashtëzakonshëm të mësimdhënësve, në detyrën dhe misionin e tyre fisnik për edukimin dhe arsimimin e brezave”,theksoi Abdixhiku.
Tutje theksoi ai se angazhimi i mësuesve është gurtheme në ndërtimin e shtetit.
“Dita e Mësuesit na kujton rëndësinë që kanë mësimdhënësit në ndërtimin e një shoqërie të drejtë, të përparuar dhe të qëndrueshme. Të gjithë ata, me pasion, përkushtim dhe angazhim të palëkundur, kontribuojnë në zhvillimin intelektual dhe moral të brezave të rinj, duke ofruar mundësi për një të ardhme më të mirë për të gjithë ne. Angazhimi i mësuesve dhe mësueseve, është gurthemel në ndërtimin e shtetit tonë dhe arsimimin e brezit që do të udhëheqë vendin në të ardhmen. Prandaj, trajtimi dinjitoz i mësimdhënësve, mbetet prioritet për Lidhjen Demokratike të Kosovës”.
