Vivian Jenna Wilson, fëmija i madh i Elon Musk, ka folur publikisht për babanë e saj, duke thënë se Musk “padyshim bëri një përshëndetje naziste” në dy tubime në janar dhe se ai është pjesë e një Shtëpie të Bardhë që është “e ligë”.
Në një intervistë me Teen Vogue, intervista e saj e dytë me median që kur ajo denoncoi publikisht babanë e saj vitin e kaluar, Wilson, 20 vjeç, tha se gjërat që babai i saj ka bërë në qeverinë federale janë “të ndyra”.
“Përshëndetja naziste ishte e çmendur. Zemër, ne do ta quajmë fikun fik dhe do ta quajmë përshëndetjen naziste, siç ishte”, tha Wilso.
“Ajo padyshim ishte një përshëndetje naziste”, shtoi ajo.
Bëhet e ditur se Wilson ra në sy të publikut vitin e kaluar pasi Musk foli për të në një podcast, duke thënë se ai ishte “mashtruar” për të nënshkruar dokumente në mënyrë që Wilson, e cila ishte 16 vjeç në atë kohë, të mund të merrte trajtim mjekësor që konfirmon gjininë, shkruan the Guardian.
“Kam humbur djalin tim, në thelb”, tha Musk.
Në një intervistë me NBC News vitin e kaluar, Wilson tha se Musk kishte munguar kryesisht në jetën e saj dhe se ai ishte shpesh mizor ndaj saj për shfaqjen e tipareve femërore kur ajo ishte duke u rritur.
Ajo shkoi në gjykatën e Kalifornisë në vitin 2022 për të hequr zyrtarisht “Musk” nga emri i saj, duke thënë në dosjet gjyqësore se “nuk jeton më me ose nuk dëshiron të ketë lidhje me babanë biologjik në asnjë formë”.
“Ai ishte i ftohtë”, tha ajo.
“Ai është i zemëruar, i pakujdesshëm dhe narcisist”, shtoi Wilson.
Sipas ligjit, Wilson duhej të detyronte babanë e saj, me të cilin ajo nuk kishte folur për muaj të tërë, të firmoste marrjen e trajtimit mjekësor që konfirmonte gjininë, pasi ajo ishte e mitur në atë kohë.
Wilson, aktualisht është studente në Tokio.
“Si një grua trans, kam frikë nga humbja e aksesit në kujdesin e garantuar mjekësor”, tha Wilson.
Wilson tha se nëna e saj, Justine Musk, gruaja e parë e Musk, e kishte mbështetur atë.
Ndryshe, miliarderi ka 14 fëmijë me katër gra të ndryshme.
Kur u pyet nëse ajo ka marrëdhënie të mira me vëllezërit e motrat e saj, Wilson u përgjigj: “Unë do të them se nuk e di në të vërtetë sa vëllezër e motra kam.”
