Kuvendi i Kosovës ka njoftuar se sot do të vazhdojë seanca konstituive, me fillim nga ora 12:00. Ky do të jetë vazhdimi i tretë i seancës konstituive, e cila dy herë radhazi dështoi të finalizohet pasi raporti i Komisionit për Verifikim mandatesh herën e parë s’ka marrë vota mjaftueshëm dhe herën e dytë s’është hedhur fare në votim.
Kryesues në këto seanca është deputeti i zgjedhur i Vetëvendosjes, Avni Dehari, i cili është më i vjetri, kurse bashkëkryesuese është deputetja e zgjedhur Sala Jashari nga PDK-ja si deputete me re.
Sekretari i partisë LVV-së që ka fituar numrin më të madh të ulëseve, Alim Rama i ka thënë RTK-së se me kërkesën për një takim konsultativ mes partive politike, kryesuesi i Kuvendit, Avni Dehari, pritet ta vazhdojë seancën e konstituimit të Kuvendit në tentativën e tretë, pas dy dështimeve.
“Tash kjo procedurë nuk është paraparë me rregulloren e Kuvendit, dhe ne mendojmë se duhet një konsultim me partitë e tjera, që të përcaktojmë rrugën përpara. Çdo mënyrë tjetër ka krijuar një pasiguri, sepse nuk jemi dakorduar as për raportin ekzistues, as për ngritjen e një komisioni tjetër verifikues të mandateve”, ka thënë ai.
Megjithatë, Rama ka deklaruar se mbeten të hapur për çdo diskutim dhe e quajti kërkesën për dorëheqje absurde.
Ftesën për takimin konsultativ, PDK, LDK dhe AAK e kanë quajtur jashtë mandatit të kryesuesit, duke iu referuar deputetit më të vjetër, Avni Dehari.
Të tria këto parti janë betonuar në qëndrimet e tyre se nuk mund të votohet raporti i Komisionit të Përkohshëm për Verifikimin e Mandateve pa dhënë dorëheqje kryeministri dhe ministrat nga postet ekzekutive, sepse, sipas tyre, nuk mund të kesh një pozitë ekzekutive dhe njëkohësisht të betohesh si deputet.
Njohës i zhvillimeve politike, Albinot Maloku, tha se Lëvizja Vetëvendosje është e detyruar të gjejë një zgjidhje bazuar në rezultatin zgjedhor.
“Në të dy tentimet ka pasur mungesë të vullnetit nga të dyja palët, por përgjegjësia për zgjidhje mbetet mbi partinë që i ka fituar zgjedhjet, për të iniciuar procedurat për konstituimin e plotë të Kuvendit”, ka thënë Maloku.
Tri partitë, LDK, PDK dhe AAK, kundërshtuan që seanca të kthehet në pikën zero, duke kërkuar që të vazhdohej me votimin e raportit që verifikon mandatet e deputetëve, por Lëvizja Vetëvendosje mbajti qëndrimin se nuk mund të votohet një raport që ka dështuar të miratohet.
Emri i kandidatit për kryekuvendar, tha sekretari i Vetëvendosjes, dihet, por se nuk është momenti për ta thënë publikisht.
