Ministrja e Arsimit, Shkencës, Teknologjisë dhe Inovacionit, Arbërie Nagavci dhe këshilltari i lartë, Muhedin Nushi kanë vënë gurthemelin për ndërtimin e shkollës në lagjen “Prishtina e Re”, në Prishtinë.
Ministrja Arbërie Nagavci ka treguar përkushtimin e saj për të siguruar që kjo shkollë e re të përmbushë standardet më të fundit bashkëkohore, hapësirat e ndritshme dhe të ngrohta, si dhe krijimin e një mjedis të shkëlqyer për mësimin dhe zhvillimin e fëmijëve.
Nagavci, po ashtu tha se, me përfundimin e kësaj shkolle brenda 36 muajve, fëmijët e lagjes “Prishtina e Re” do të kenë mundësi për të ndjekur mësimet në një shkollë të re dhe moderne, gjë që është shumë e nevojshme për këtë zonë që po rritet me shpejtësi.
Ndër të tjera, Nagavci theksoi se inaugurimi i 20 çerdheve në këto katër vite dhe plani për përfundimin e 45 çerdheve të tjera, tregon përkushtimin për të krijuar ambiente të sigurta dhe të mira për fëmijët.
“Me një buxhet prej mbi 400 milion euro për vitin 2025, është e qartë se investimet në arsim janë një prioritet i lartë”, tha ndër të tjera Nagavci.
Kjo shkollë është investim i Ministrisë së Arsimit, me një shumë prej 3,323,232.32 euro, sipërfaqe prej 6430.00m² dhe kapacitet për 800 fëmijë. Investimet totale në komunën e Prishtinës gjatë këtij mandati katër vjeçar janë 8,124,686.76 euro./Kosova Post/
