Bastioni tradicional i Demokratëve në Dearborn të Miçiganit në ShBA, i njohur si kryeqyteti i komunitetit arabo-amerikan, i dha një goditje Partisë Demokratike në zgjedhjet presidenciale të së martës në ShBA për shkak të mbështetjes së saj për veprimet e Izraelit në Gaza, transmeton KosovaPost.
Rezultatet jozyrtare treguan se kandidati i Republikanëve Donald Trump siguroi 42,48 për qind të votave në këtë qytet, shumë përpara kandidates demokrate Kamala Harris me 36,26 për qind, ndërsa Jill Stein i Partisë së Gjelbër mori 18,37 për qind, me pjesëmarrjen e votuesve të regjistruar në rreth 55 për qind. Trump po ashtu ka fituar në përgjithësi në Miçigan, i konsideruar prej kohësh si një shtet i Demokratëve.
Dearborn, vendi i xhamisë më të madhe të Amerikës së Veriut dhe afërsisht 250.000 votues myslimanë, bëri një ndryshim të theksuar nga viti 2020, kur demokrati Joe Biden fitoi Miçiganin me rreth 150.000 vota, duke mposhtur presidentin e atëhershëm Trump, i cili po përfundonte mandatin e tij të parë në detyrë.
Votuesit kishin një zgjedhje të vështirë për të bërë, duke pasur parasysh tragjedinë në Gaza – ku sulmet e Izraelit gjatë 13 muajve të fundit kanë vrarë mbi 43.000 palestinezë dhe kanë shkatërruar Rripin e Gazës – dhe kritikat e tyre të thella ndaj politikave të ShBA-së, ose të bojkotonin votimin.
Në vend që të mbështetet Trump, tendenca ka qenë të ndëshkohet lidershipi demokrat për mbështetjen e saj politike, ekonomike dhe ushtarake për gjenocidin në Gaza.
Abdullah Hammoud, kryebashkiaku i Dearbornit dhe një demokrat, pretendoi se administrata Biden e sheh komunitetin arab thjesht si një “bankë votash”, duke kritikuar qasjen e partisë ndaj arabo-amerikanëve.
Qyteti, ku 54,5 për qind e banorëve thonë se janë me trashëgimi të Lindjes së Mesme ose të Afrikës Veriore, dëshmoi aktivitete intensive të fushatës kundër Demokratëve nga aktivistët myslimanë që protestonin kundër politikës së administratës në lidhje me Gazën.
Lëvizja “Abandon Harris” në Miçigan e cilësoi votimin kundër Harrisit si “votim kundër gjenocidit”, duke reflektuar mosmiratimin e gjerë të mbështetjes ushtarake dhe ekonomike të administratës demokrate për Izraelin.
Bill Bazzi, kryebashkiaku arabo-amerikan në Dearborn Heights, mbrojti mbështetjen e tij për Trumpin – një mbështetës i Izraelit, i cili si president në mënyrë kontroverse u përpoq të ndalonte njerëzit nga shtatë vende me shumicë myslimane të hynin në ShBA – duke theksuar mungesën e luftërave të reja gjatë administratës së mëparshme të Trumpit.
Ndërkohë, disa amerikanë arabë dhe myslimanë, duke përfshirë grupin e avokimit “Engage Action”, ende bënë thirrje për mbështetjen e Harrisit, duke argumentuar se ishte një zgjedhje strategjike për të parandaluar kthimin e Trumpit në detyrë.
Rezultatet e zgjedhjeve në Dearborn sinjalizuan një ndryshim të rëndësishëm në modelet e votimit të komunitetit arabo-amerikan, tradicionalisht të lidhur me Demokratët, dhe pasqyrojnë pakënaqësinë në rritje me politikën e jashtme të ShBA-së mbi Lindjen e Mesme./trt
