Rreshteri policor Muhamed Lika nga Kaçaniku ka mbetur i vdekur, si pasojë e të shtënave me armë.
E për këtë vrasje ka reaguar Sindikata e Policisë së Kosovës.
Sindikata dënon atentatin kriminal që i mori jetën rreshter Muhamed Lika.
“Ky akt i rëndë është një atentat i drejtpërdrejtë ndaj sigurisë publike, ligjit dhe vetë shtetit të Kosovës. Çdo sulm ndaj një zyrtari policor është sulm ndaj Republikës së Kosovës!”, thuhet në reagimin e Sindikatës së Policisë së Kosovës.
Tutja nga Sindikata , theksojnë se Policia e Kosovës është shtylla kryesore e rendit dhe sigurisë në vend.
“Prekja e saj është përpjekje për të minuar themelet e shtetit tonë dhe nuk do të tolerohet. Sindikata e Policisë së Kosovës kërkon nga të gjithë akterët shtetërorë dhe institucionet e drejtësisë veprime të menjëhershme për zbardhjen e këtij akti kriminal dhe vënien para përgjegjësisë të autorëve”, thuhet tutje në reagim.
Më tej Sindikata ka shtuar se qëndrojnë të palëkundur në mbështetje të çdo pjesëtari të Policisë së Kosovës dhe nuk do të lejojnë që këto akte të frikësimit të lëkundin përkushtimin ndaj detyrës dhe Republikës.
“Nder dhe lavdi për sakrificën e Rreshter Muhamed Lika!”, thuhet në reagim.
