Ministrja e Drejtësisë, Albulena Haxhiu, pas lajmit të vrasjes së një gruaje në Pejë, ka ftuar në takim përfaqësuesit e institucioneve të sigurisë e drejtësisë.
“Për këtë gjë sot kam ftuar në takim ministrin e Punëve të Brendshme, kryesuesit e këshillave, u.d Kryeprokurorin dhe Drejtorin e Policisë së Kosovës dhe po ashtu në një takim tjetër edhe mbledhjen e grupit ndërministror”, tha ministrja.
E trishtuar për ngjarjen ajo është shprehur se nuk ka rrugë tjetër pos si institucione të Republikës së Kosovës të luftojmë pa kompromis këto fenomene.
Tutje tha ajo se dhunuesit janë bërë vrasës pikërisht për shkak të mosndëshkimit adekuat nga institucionet përkatëse.
Haxhiu thekson gjithashtu se vrasjet e grave në Kosovë janë bërë fenoment tejet shqetësues.
“Vrasjet ndaj grave në Republikën e Kosovës janë bërë fenomen që tejkalon çdo shqetësim. Nuk mund të presim emancipimin e askujt derisa të bëhen të vetëdijshëm për barazinë mes burrit dhe gruas. Asnjë qytetar nuk është mbi dikë tjetër, askush nuk është pronë e askujt. Gruaja dhe burri janë të barabartë. Dhe si shtet nuk do të tolerojmë asnjëlloj dhune të burrit ndaj gruas”, ka shkruar tutje ministrja e Drejtësisë.
