Pas shkrimeve të shumta në media se Goran Vuçetiq ka rrahur ish-kryetarin e Listës Serbe, Goran Rakiqin, ai ka punësuar zyrën e avokatisë së Dejan Vasiqit për të nisur procedurat juridike ndaj të gjitha mediave që kanë raportuar këtë lajm, për të cilin, ai pretendon se nuk është i vërtetë.
Avokati Dejan Vasiq ka deklaruar për portalin serb “kosovonline” se do të inicojë procedura kundër të gjitha mediave që kanë raportuar këtë lajm.
“Dua të informoj opinionin se do të fillojmë procedurat ligjore kundër të gjitha mediave që kanë raportuar “informacione të rreme” dhe do të kërkojmë kompensim për dëmin jo material që ka pësuar Goran Vuçetiq. Ai ka qenë me shokët e tij, duke ecur në Mokra Gorë dhe në atë moment nuk ka qenë fare në Mitrovicë dhe kur lexon një gjë të tillë, as për të dhe as për familjen e tij nuk është fare e këndshme. Këto janë strese që duhet të ndiqen penalisht në procedurë civile kundër atyre që kanë publikuar informacione të tilla”, ka pretenduar Vasiq.
Mediat kosovare prej ditësh raportojnë se ish-kryetari i Listës Serbe, Goran Rakiq është rrahur në një rrahje që ka ndodhur në një lokal në Mitrovicën e Veriut, ndërsa në lajme qëndrimi zyrtar i policisë është se ata nuk kanë detaje për këtë ngjarje, mediat që raportojnë në gjuhën shqipe kanë shkruar se Goran Vuçetiqi është personi që ka rrahur Goran Rakiqin duke publikuar foto të Goran Vuçetiqit.g.e.
