Aleksandar Vuçiq tha sot se ka marrë një vendim për të falur 12 individë dhe se ky ishte gabimi i tij më i madh që kur u bë president i Serbisë.
Ai tha se këtë vendim e mori kohët e fundit, duke plotësuar kërkesën e tretë të studentëve, të cilët do të organizojnë një protestë masive gjatë ditës së nesërme në Beograd.
“Kam bërë diçka për të cilën pendohem thellësisht. Dhe do të pendohem deri në fund të jetës sime. Unë nuk kam marrë asnjë vendim për të falur ndonjë individ gjatë tetë viteve të kaluara, që kur kam qenë president. Kam marrë vendim për të falur dymbëdhjetë individë dhe për t’i shpallur ata të paprekshëm nga ndjekja penale. Dhe kam bërë gabimin më të madh që kur kam qenë president”, deklaroi ai.
Vuçiq shtoi se pendimi i tij është kaq i thellë “sa që çdo javë deri në fund të mandatit do të kërkoj falje nga qytetarët e Serbisë për atë që kam bërë”.
Ai thotë se është i gatshëm të bie edhe nga pushteti “kjo është sa kam kuptuar, nesër, jam krenar për atë që kam bërë gjatë 15 viteve të fundit. Nuk do të qaj, dhe pasnesër do të flasim për atë se si më rrëzuan. Kjo është një thirrje e hapur për dhunë. Ju që po shkatërroni serbët si komb, ju që mendoni se Kosova është e pavarur, ju që mendoni se serbët janë një komb genocidal”, kështu i quajti organizatorët e protestave Vuçiq.
“Nesër do të jenë nga 60 deri në 80 mijë njerëz. Ata janë të pasur, mund të sjellin shumë njerëz. Kurrë nuk do të heq dorë nga populli që e urrejnë kaq shumë”, shtoi ai.
Ndryshe, studentët kanë thirrur për nesër një ndër protestat më masive që prej kohës kur u detyrua të jepte dorëheqje ish-krimineli serb, Slobodan Milosheviq. /Telegrafi/
