Ish-ligjvënësi shqiptar në Kuvendin e Serbisë, Fatmir Hasani vlerëson se presidenti i Serbisë, Aleksandar Vuçiq është futur në ‘gërshërë’.
Hasani ka thënë se presidenti serb është duke përjetuar një krizë të brendshme të thellë e cila nuk zgjidhet lehtë.
Sipas tij Ballkani është në rrezik nga Vuçiqi dhe presidenti i Republikës Sërpska, Millorad Dodik.
“Si duket i ka ardhur fundi por dita e saktë nuk dihet. Sidoqoftë ai ka hyrë në gërshërë, në situatë të vështirë dhe nuk mund të dalë ashtu aq lehtë. Ballkani është në rrezik nga Vuçiqi dhe Dodiku. Ata vitet e fundit kanë punuar shumë për botën serbe dhe Vuçiq ka një krizë të brendshme të thellë e cila nuk zgjidhet lehtë. Është mundësia që Vuçiq dhe Dodik këto ditë janë në rrezik shumë të madh edhe ta bëjnë një plan tjetër për të dalë nga kjo krizë dhe këtu mund të eskaloj diçka më e madhe por nuk është e pamundshme edhe lufta qytetare për shkak se janë nxehur mjaft këto dy tabore”, ka thënë ai në emisionin “Info Nata” në Tëvë1.
Ndryshe, studentët në Serbi tash e katër muaj po organizojnë tubime në disa qytete të mëdha në Serbi, duke kërkuar përgjegjësi për vdekjen e 15 personave në Novi Sad, pas shembjes të një strehe betoni në stacionin hekurudhor të Novi Sadit më 1 nëntor 2024.
Studentët, përmes bllokadave dhe protestave, po kërkojnë publikimin e të gjithë dokumentacionit lidhur me rikonstruksionin e Stacionit Hekurudhor të Novi Sadit, për të përcaktuar përgjegjësinë për aksidentin, ndjekjen penale të sulmuesve të pjesëmarrësve në protestat e deritanishme, si dhe pezullimin e procedurave ndaj të arrestuarve në demonstrat.
