Organizatat e dala nga lufta e Ushtrisë Çlirimtare të Kosovës do të mbajnë sot, me fillim nga ora 17:00, një protestë në Prishtinë për të kundërshtuar padrejtësitë nga ana e Gjykatës Speciale në Hagë. Protesta vjen pas raportimeve se dokumente dhe dosje të Serbisë po përdoren si prova në proceset gjyqësore ndaj ish-krerëve të UÇK-së, transmeton Kosova Post.
Gjatë një konference për media të mbajtur të mërkurën, përfaqësuesit e organizatave të dala nga lufta u bënë thirrje qytetarëve që të dalin masivisht në mbështetje të kësaj proteste, e cila synon të mbrojë luftën çlirimtare dhe dinjitetin e saj.
Mbështetje për protestën kanë shprehur edhe partitë opozitare: Partia Demokratike e Kosovës (PDK), Lidhja Demokratike e Kosovës (LDK) dhe Aleanca për Ardhmërinë e Kosovës (AAK).
Ndërkohë, zëdhënësi i Lëvizjes Vetëvendosje, Arlind Manxhuka, ka reaguar përmes një postimi në Facebook, duke listuar gjashtë pika lidhur me protestën. Ai vlerëson se protesta është e vonuar dhe thekson se në më pak se pesë vjet, qeveria Kurti ka shpenzuar mbi 33 milionë euro për mbrojtjen e të akuzuarve në Hagë.
Ndër pikat e tjera të theksuara nga Manxhuka janë:
Protesta është dhjetë vjet e vonuar; duhej të mbahej në vitin 2015.
Lufta çlirimtare nuk mund të rishkruhet, por as historia e krijimit të Gjykatës Speciale.
Kosova ka nevojë për drejtësi të brendshme, transparente dhe me besim publik, jo për gjykata speciale me standarde të dyfishta.
Ish-presidenti Thaçi, në një intervistë të fundit nga Haga, ka pasur qëndrim të butë ndaj Gjykatës Speciale.
Opozita, sipas tij, ka përdorur çështjen e të akuzuarve më shumë për të sulmuar qeverinë Kurti sesa për lirimin e tyre.
Protesta pritet të zhvillohet në sheshin “Skënderbeu” dhe të përfshijë qytetarë nga të gjitha trevat, si dhe përfaqësues të familjeve të dëshmorëve dhe veteranëve të luftës.
