Ukraina nuk mund ta largojë ushtrinë ruse nga territori i Krimesë. Kështu ka bërë të ditur Presidenti i Ukrainës, Volodymyr Zelenskyy në një intervistë për median franceze “Le Parisien”, ka pranuar se forcat e armatosura të Ukrainës nuk janë në gjendje të dëbojnë trupat ruse nga Krimea dhe territoret e tjera të pushtuara në Ukrainë.
“Ne nuk mund të heqim dorë nga territoret tona. Kushtetuta e Ukrainës na e ndalon këtë. De facto, këto territore tani kontrollohen nga rusët. Ne nuk kemi forcë për t’i rikuperuar ato”, tha ai për gazetën franceze Le Parisien. “Ne mund të llogarisim vetëm në presionin diplomatik nga komuniteti ndërkombëtar për ta detyruar Putinin të ulet në tryezën e bisedimeve”, tha ai.
Rusia aneksoi gadishullin e Krimesë në Detin e Zi në vitin 2014 dhe kontrollon rreth 80 për qind të Donbasit, një zonë industriale që përfshin rajonet Donetsk dhe Luhansk, shkruan A2 CNN. Ajo ka kapur gjithashtu pjesë të rajoneve Kherson dhe Zaporizhzhia, megjithëse nuk kontrollon qytetet kryesore në asnjërën zonë. Kremlini thotë se të pesë rajonet i përkasin Rusisë.
