Zëvendëspresidenti i SHBA JD Vance deklaroi se SHBA mund të godasë Moskën me sanksione dhe veprime të mundshme ushtarake nëse presidenti rus Vladimir Putin nuk bie dakord për një marrëveshje paqeje me Ukrainën që garanton pavarësinë afatgjatë të Kievit.
“Ka mjete ekonomike por ka dhe mjete ushtarake. Ne kujdesemi që Ukraina të ketë pavarësi sovrane” tha Vance
Presidenti amerikan Donald Trump diskutoi të mërkurën për luftën me presidentin rus Vladimir Putin dhe veçmas me presidentin e Ukrainës Volodymyr Zelenskiy dhe u tha zyrtarëve amerikanë që të fillonin bisedimet për t’i dhënë fund konfliktit gati tre-vjeçar.
Thirrjet telefonike erdhën menjëherë pasi Sekretari amerikan i Mbrojtjes Pete Hegseth theksoi aleatëve të Ukrainës në Bruksel se një kthim në kufijtë e Ukrainës para vitit 2014 – përpara se Rusia të aneksonte Krimenë – ishte jorealiste dhe se SHBA nuk e sheh anëtarësimin në NATO të Kievit si pjesë e një zgjidhjeje.
Më herët gjatë ditës, presidenti republikan tha se Ukraina do të përfshihej në bisedimet e paqes me Rusinë, shkruan balkanweb.al.Ai u tha gazetarëve në Shtëpinë e Bardhë se Ukraina do të kishte një vend në tryezë gjatë çdo negociate paqeje me Rusinë për përfundimin e luftës.
