Kryetari i Aleancës për Ardhmërinë e Kosovës, Ramush Haradinaj, kujton masakrën e Lybeniqit në 25 vjetorin e saj, ndërsa shprehet se aty janë vrarë fëmijë, gra e pleq dhe shtoi se barbaria e shtetit fashist serb nuk ka kursyer askënd që i ka dalë para, përcjell Kosova Post.
I pari i AAK-së, shpreh dhimbje e pikëllim për viktimat, thekson se “Sa herë vijmë në Lybeniq, një pjesë e zemrës mbetet këtu, me familjarët që ende presin që të dashurit e tyre të kenë një varr për t’iu vendosur lule”.
Tutje tha Haradinaj se Lybeniqi u masakrua edhe më 25 maj 1998, e java e parë e prillit 1999 ishte e kobshme për këtë fshat e zonën përreth, që u bënë cak të represionit të tmerrshëm e të paparë”.
Postimi i plotë i Ramush Haradinajt në Facebook:
Sa herë vijmë në Lybeniq, një pjesë e zemrës mbetet këtu, me familjarët që ende presin që të dashurit e tyre të kenë një varr për t’iu vendosur lule.
Lybeniqi u masakrua edhe më 25 maj 1998, e java e parë e prillit 1999 ishte e kobshme për këtë fshat e zonën përreth, që u bënë cak të represionit të tmerrshëm e të paparë. Armiku ekzekutoi mbi njëqind shqiptarë të paarmatosur, nga fshatrat Lybeniq, Buçan, Rashiq, Loxhë, Kosuriq e Prilep.
A vritet njeriu, vetëm se e ëndërron lirinë e Atdheut të tij? Këtë e bëri pa mëshirë barbaria e shtetit fashist serb, që nuk kurseu askënd që i doli para, gra, fëmijë e pleq.
Asnjëherë nuk do t’i harrojmë njerëzit tanë, që me jetët e tyre i’u bënë mburojë kësaj toke.
Sot e për mot, përulemi me respekt para sakrificës së të rënëve për liri!
