Kryetari i LDK-së, Lumir Abdixhiku, kujton Fehmi Aganin në 25 vjetorin e vrasjes, ndërsa shprehet ai se profesori ishhte i urti i rrugëtimit të fuqishëm për liri e pavarësi, transmeton Kosova Post.
Ai, kujton gjithashtu se, Agani si politikan sociolog ishte truri i lëvizjes për liri, pavarësi e demokraci.
Tutje thekson Abdixhiku se profesori si nënkryetari i Lidhjes Demokratike të Kosovës, ishte dora e djathtë e Residentit Rugova.
Për më tepër ai shprehet se Agani mbetet njëri ndër figurat më të mëdha kombëtare dhe se maturia, urtësia e thellësia e mendimeve të tij, janë shenja të secilit kujtim që sot kemi për të.
Abdixhiku ndërkaq , thekson se vrasja e Aganit ishte akt hakmarrjeje për triumfin historik të Koosvës.
“Ai u vra 25 vite më parë, më 5 maj të vitit 1999. Vrasja e tij nga forcat ushtarake e policore serbe, ishte akt hakmarrjeje për triumfin tonë historik; Ishte vrasje e boshtit intelektual e ideologjik të vet Kosovës”, tha Kryetari i LDK-së
Ndërsa vlerëson lartë figurën e profesori Aganit , ai shpalosi edhe diçka nga veprimtaria dhe kontributi i tij si profesor e edhe si politikan.
“Fehmi Agani u lind në Gjakovë në vitin 1932, ku dhe mbaroi shkollimin fillor. Shkollimin e mesëm e kreu në Prishtinë, ndërsa studimet për filozofi i mbaroi në Universitetin e Beogradit; ku dhe magjistroi në shkenca politike. Gradën doktor i shkencave të sociologjisë e mori në Fakultetin Filozofik të Universitetit të Prishtinës më 1973, në temën “Partitë dhe grupet politike në Shqipëri gjatë Luftës së Dytë Botërore”. Gjatë viteve 50-ta e 60-ta, ai punoi si profesor i shkollave të mesme në Gjakovë dhe në Prishtinë, ndërsa më vonë ishte i anagzhuar si gazetar dhe redaktor i politikës së jashtme në gazetën “Rilindja”. Në vitet 60-ta nisi punën ligjërues i sociologjisë në Fakultetin Filozofik; për të përfunduar si dekan aty. Në vitin 1967, profesor Agani u zgjodh drejtor themelues i Institutit Albanologjik të Prishtinës. Fehmi Agani ishte themelues i Degës së Sociologjisë dhe të Filozofisë në Fakultetin Filozofik dhe i Institutit të Sociologjisë të këtij fakulteti. Ai ishte kryeredaktor i revistave Studia Humanistica dhe Thema. Në fund të vitit 1989, ai së bashku me intelektualë e patritotë të kohës, themeloi lëvizjen më të madhe politike të shqiptarëve të Kosovës – Lidhjen Demokratike të Kosovës. Pjesa tjetër është histori lavdie”, shprehet Abdixhiku.
Ndërkohë thekspn Abdixhiku se “Në këtë përvjetor prej çerek shekulli, së bashku me struktura nga mërgata, nderuam dhe kujtuam profesor Aganin mu te këndi i tij, tani pjesë e pandashme e shtëpisë së madhe të demokracisë!”
