Kryetari i LDK-së, Lumir Abdixhiku, ka thënë se “ekzekutimi i Bajram, Kastriot e Kushtrim Kelmendit, ishte përpjekje kriminale shtetërore serbe për shuarjen e së vërtetës”, përcjell Kosova Post.
Tutje theksoi Abdixhiku se kjo ngjarje na qëndron si rikujtim jo vetëm i mizorisë shtetërore që vendosej mbi popullin e Kosovës, por edhe si rikujtim trishtues i çmimit të madh të vet lirisë.
“Kushtrimi ishte vetëm 16 vjeç, Kastrioti ishte 30. Ata, së bashku me avokatin Bajram Kelmendi, u kidnapuan e më pas u ekzekutuan nga forcat serbe në natën e parë të bombardimeve të NATO-s, një çerek shekulli më parë.”
Abdixhiku, tutje u shpreh se në zyrën e avokaturës së Bajram Kelmendit qëndrojnë ende gjurmët.
Postimi i plotë i Lumir Abdixhikut në Facebook:
Kushtrimi ishte vetëm 16 vjeç, Kastrioti ishte 30. Ata, së bashku me avokatin Bajram Kelmendi, u kidnapuan e më pas u ekzekutuan nga forcat serbe në natën e parë të bombardimeve të NATO-s, një çerek shekulli më parë.
Në zyrën e avokaturës së Bajram Kelmendit, gjurmët e 25 viteve më parë qëndrojnë ende. Mes plumbave në muri, lëndëve të shumta mbrojtëse të shqiptarëve të maltretuar e persekutuar, mes një makine shkrimi Olympia, një rafti librash e një makine faksi, qëndronin ende kujtimet për një aktivist, veprimtar e një patriot të madh të lëvizjes kombëtare për liri, pavarësi e demokraci; ekzekutimi i të cilit ishte hakmarrje për triumfin që po i afrohej Kosovës në pranverën e vitit 1999-të.
Sot, në përvjetorin e 25-të, së bashku me Kosovaren, të bijën e Bajram dhe Nekibe Kelmendit, motrën e Kastriot e Kushtrim Kelmendit, vizituam zyrën nga ku krimet makabre të regjimit të Millosheviqit ballafaqoheshin me drejtësinë. Ekzekutimi i Bajram, Kastriot e Kushtrim Kelmendit, ishte përpjekje kriminale shtetërore serbe për shuarjen e së vërtetës. Ajo sot na qëndron si rikujtim jo vetëm i mizorisë shtetërore që vendosej mbi popullin e Kosovës, por edhe si rikujtim trishtues i çmimit të madh të vet lirisë.
Sot, nderojmë Bajram, Kushtrim e Kastriot Kelmendin, siç dhe nderojmë zonjën Nekibe Kelmendi, humbja e të cilës u shndërrua në forcë të jashtëzakonshme veprimi politik në vitet e mbetura të jetës së saj. Rrëfimi jetësor i saj, është rrëfim prej guri.
Kujtimi ynë për gjithë familjen Kelmendi, është ndjenjë dhimbjeje dhe ndjenjë mburrje. I përjetshëm kujtimi për ta!
