Departamenti amerikan i Shtetit ka miratuar një shitje ushtarake prej 2.555 milionë dollarësh, nga të cilat 2.2 miliardë dollarë janë avionë mallrash “C-130J” dhe 355 milionë dollarë janë radarë të mbrojtjes ajrore, transmeton Kosova Post.
Në një deklaratë me shkrim ngaAgjencia e Bashkëpunimit për Sigurinë e Mbrojtjes së SHBA-së, shkruhet se “Departamenti i Shtetit ka vendosur të miratojë shitjen Egjiptit të aeroplanit të mallrave “C-130J Super Hercules” dhe pajisjeve të lidhura me të, me një vlerë prej 2.2 miliardë dollarësh”.
Në deklaratën ku thuhej se Kongresit i është dërguar një njoftim për miratimin e shitjes, nënvizohet se paketa e shitjes përfshinte 12 avionë “C-130J”, 12 motorë rezervë dhe pajisje të tjera mbështetëse.
Në deklaratën e dytë të bërë nga agjencia, theksohet se është miratuar shitja e sistemeve të radarëve të mbrojtjes ajrore në vlerë 355 milionë dollarë në Egjipt.
Në deklaratë thuhet se kjo paketë shitjesh përfshin 3 sisteme radari tokësor “SPS-48“, pjesë këmbimi për këto sisteme, motorë, gjeneratorë dhe pajisje të tjera.
Nëse Kongresi Amerikan nuk kundërshton vendimin e Departamentit brenda 30 ditë pune, administrata fillon negociatat me shtetin ku miratohet shitja për përmbajtjen e paketës së shitjes.
Në përfundim të këtyre negociatave, SHBA i ofron një letër oferte atij vendi.
Nëse oferta merr përgjigje pozitive, do të zhvillohet procesi i dorëzimit.