Policia serbe dhe autoritetet e inteligjencës po përdorin spyware të avancuar të telefonave së bashku me produktet mjeko-ligjore të telefonave celularë për të shënjestruar në mënyrë të paligjshme gazetarë, aktivistë mjedisorë dhe individë të tjerë në një fushatë të fshehtë të mbikëqyrjes, ka zbuluar një raport i ri i Amnesty International.
Raporti, “Një burg dixhital”: Mbikëqyrja dhe shtypja e shoqërisë civile në Serbi”, dokumenton se si produktet mjekoligjore celulare po përdoren për të nxjerrë të dhëna nga pajisjet celulare që u përkasin gazetarëve dhe aktivistëve.
Ai zbulon gjithashtu se si policia serbe dhe Agjencia e Informacionit të Sigurisë (Bezbedonosno-informativna Agencija – BIA) kanë përdorur një sistem spyware Android të porositur, NoviSpy, për të infektuar fshehurazi pajisjet e individëve gjatë periudhave të ndalimit ose intervistave me policinë.
“Hetimi ynë zbulon se si autoritetet serbe kanë vendosur teknologjinë e mbikëqyrjes dhe taktikat e represionit dixhital si instrumente të kontrollit dhe represionit më të gjerë shtetëror të drejtuar kundër shoqërisë civile,” tha Dinushka Dissanayake, zëvendës drejtoreshë rajonale e Amnesty International për Evropën.
“Ai gjithashtu thekson se si produktet mjekoligjore celulare, të përdorura gjerësisht nga policia dhe shërbimet e inteligjencës në mbarë botën mund të përbëjnë një rrezik të madh për ata që mbrojnë të drejtat e njeriut, mjedisin dhe lirinë e fjalës, kur përdoren jashtë kontrollit dhe mbikëqyrjes së rreptë ligjore”, thuhet në raport, shkruan rtk. Ndryshe Spyware është çdo malware që synon të mbledhë informacione për një person ose organizatë dhe t’ia dërgojë atë një subjekti tjetër në një mënyrë që dëmton përdoruesin.
