Kryesuesi i Komisionit Qeveritar për Persona të Zhdukur, Andin Hoti ishte i ftuar të premten në emisionin “LIBERO” në një rrëfim ekskluziv, ku rrëfeu shumë momente rrëqethëse për sa i takon “betejës” së tij 24 vjeçare për të pagjeturit.
Një temë kjo e ndierë deri në palcë nga ai, pasi që Hoti është djali i veprimtarit për çështje kombëtare Ukshin Hoti.
Ai rrëfeu për momentet e vështira që i përjeton çdo ditë, duke pritur qoftë edhe një informacion nga babai i tij, derisa kujtoi edhe momentin e fundit kur u takua me të.
“…Familjet që presin familjarët e tyre janë ende në luftë me Serbinë, sepse ende çdo ditë zgjohen me shpresën dhe ankthin që mund të marrin informacione për më të dashurit e tyre…E kujtoj takimin e fundit që e kam bërë me babin, krejt çka mbajë mend janë disa grila në mes – ai në njërën anë e unë në tjetrën…”, theksoi Hoti.
Ai deklaroi se ka pasur edhe raste kur kanë përjetuar lajthitje në forma të ndryshme, nga njerëzit që pretendonin se kishin informacione për Ukshin Hotin, madje edhe në këmbim të të hollave.
“…Kjo ka ndodhur disa herë. Së fundmi më ka ndodhur para dy viteve, më janë kërkuar njëherë 200 mijë e më pas 400 mijë euro, në këmbim të informacionit se babi është diku gjallë…”, tha Hoti.
Vlen të potencohet se veprimtari i çështjes kombëtare, Ukshin Hoti është ende i zhdukur dhe nuk dihet asgjë për fatin e tij që nga 16 maji i vitit 1999, ditë e diel ku edhe e ka përfunduar zyrtarisht dënimin 5 vjeçar të burgut.
