Iniciativa për Progres (INPO) ka shprehur shqetësimin për mënyrën se si Organi Shqyrtues i Prokurimit (OShP) ka trajtuar ankesën e Kompanisë Rajonale të Mbeturinave “Pastrimi” ndaj Komunës së Prishtinës.
INPOka theksuar se OShP ka refuzuar të shqyrtojë ankesën duke u thirrur në mungesë juridiksioni, ndonëse paraprakisht e ka pranuar atë si të rregullt, ka caktuar panel shqyrtues dhe ka trajtuar çështjen në përmbajtje.
Një qasje e tillë, sipas kësaj organizate, është në kundërshtim me parimet bazë të procedurës administrative dhe me nenin 105 të Ligjit për Prokurimin Publik, i cili kërkon shqyrtimin e ankesave në merita lidhur me shkeljet e mundshme të këtij ligji.
“Ky vendim përfaqëson një shkelje të parimit të trajtimit të drejtë dhe koherent të palëve dhe cenon parimin e sigurisë juridike, duke dëmtuar të drejtën për shqyrtim efektiv të një ankese të bazuar në fakte dhe në ligj. Po ashtu, ky rast ngre shqetësim serioz për rolin mbikëqyrës të OShP-së, e cila ka për detyrë të mbrojë ligjshmërinë në procedurat e prokurimit, përfshirë rastet kur autoritetet kontraktuese shmangin zbatimin e dispozitave për kontraktim brenda autoriteteve publike (in-house procurements), siç parashihet në nenin 9.4 të Ligjit për Prokurim Publik”, thuhet në reagim.
Sipas INPO-s, në këtë rast konkret, bëhet fjalë për një ndërmarrje publike me pronësi rreth 77% nga Komuna e Prishtinës dhe të autorizuar me rregullore komunale si ofruesi i vetëm i shërbimit të grumbullimit të mbeturinave, rrethana që e bëjnë të drejtë dhe të ligjshme kontraktimin përmes marrëveshjes “in-house”, pa tender të hapur.
“Refuzimi i OShP-së për të shqyrtuar këtë veprim të Komunës përbën jo vetëm shmangie nga përgjegjësia institucionale, por krijon precedent të rrezikshëm për anashkalim të ndërmarrjeve publike dhe zbehje të transparencës e llogaridhënies në prokurim publik. Ky vendim i OSHP-së është në kundërshtim me vet praktikën e këtij institucioni, pasi që në të kaluarën OSHP ka shqyrtuar në merita këto ankesa nga ndërmarrjet publike, ku shumë nga to janë aprovuar si të tilla nga ky organ epror administrativ”, theksohet në reagim
INPO e fton OShP-në, të reflektojë dhe të rikthehet në përmbushjen e plotë të mandatit të saj ligjor, dhe të garantojë trajtim të drejtë, të paanshëm dhe të mbështetur në ligj për çdo ankesë që ndërlidhet me mbrojtjen e interesit publik dhe të shërbimeve publike.
INPO kërkon që OShP të anuloj vullnetarisht këtë vendim dhe ankesën e Kompanisë Rajonale të Mbeturinave “Pastrimi” ta shqyrtoj në merita, duke e aprovuar apo refuzuar atë, mirëpo jo të fshihet kinse pas mungesës së juridiksionit. Një qasje e tillë, përbën abstenim të OShP-së nga përgjegjësia ligjore që ka, në parandalimin e shkeljeve ligjore në aktivitetet e prokurimit publik.
