Policia e Kosovës ka arrestuar një person të dyshuar për kanosje me armë zjarri në Shtërpcë, pas një incidenti të raportuar të premten rreth orës 18:50.
Ngjarja ka ndodhur në rrugën magjistrale Kaçanik-Shtërpcë, në fshatin Brod.
“Një person derisa po qarkullonte me veturën e tij me targa vendore, është përcjellur nga një veturë tjetër, shoferi i së cilës ka ndaluar në rrugë dhe e ka kanosur me armë zjarri dhe është larguar në drejtim të Shtërpcës. Disa minuta më vonë policët e stacionit kanë arritur që në qendër të Shtërpcës të ndalojnë veturën e dyshuar dhe gjatë kontrollimit të dokumentacionit të shoferit dhe veturës kanë gjetur një armë të zjarrit (pistoletë ) me 28 fishekë”, ka njoftuar policia.
Tutje bëhet e ditur se i dyshuari E.B. i moshës 35 vjeçare është shoqëruar në stacionin e policisë në Shtërpcë dhe pas intervistimit nga policët hetues, me vendim të prokurorit të shtetit është ndaluar në mbajtje për 48 orë për procedura tjera hetimore, ndërsa si provë materiale është sekuestruar arma e zjarrit.
