Ish-kryenegociatori, Skënder Hyseni ka thënë se çështja e Asociacionit të Komunave me shumicë serbe është kthyer në gogol që po i frikëson edhe fëmijët e Kosovës.
Hyseni tha se pse LDK-ja duhet të sillet si LVV-ja, teksa u shpreh se po e bën për vota.
“Asociacioni është kthyer në gogol që i frikëson edhe fëmijët e Kosovës, emri kur dëgjohet. Pa u thelluar më tutje, pa u thelluar në substancë. Vetëvendosja po e korr atë që e ka mbjell. Ajo që më dhemb mu që pse LDK duhet të sillet si VV-ja. Po kalkulon për vota”, ka deklaruar ai në emisionin “Këndi i Debatit”, në Tëvë1.
Sipas tij, cilido që do të ishte kryeministër i Kosovës sot, nuk do të kishte “qare” pa e pranuar marrëveshjen.
“Cilido që do të ishte kryeministër i Kosovës sot, nuk do të kishte bash qare pa e pranuar këtë marrëveshje. Po e them pa kalkulime. E gjithë bota e di qëndrimin tim ndaj Kurtit. Unë e vlerësojë Kurtin zero si politikan mirëpo kushdo që do të ishte sot aty, do ta nënshkruante dhe do të bënte fortë mirë”, theksoi Hyseni, teksa shtoi se Asociacioni nuk ka “qare” pa u zbatuar.
