Kryetari i Aleancës për Ardhmërinë e Kosovës, Ramush Haradinaj, kujton Betejën e Çabratit, ndërsa bëri homazhe në nderim të heroizimit dhe të rënies së trimave të Brigadës 137 “Gjakova”, përcjell Kosova Post.
Duke kujtuar heroizmin dhe atdhedashurinë e të rënëve, Haradinaj tha se në luftën çlirimtare Gjakova ka dhënë shumë djem e vajza.
“Gjakova, vatër e atdhedashurisë dhe shqiptarisë ndër breza, i fali shumë lirisë së Atdheut. Në Ushtrinë Çlirimtare të Kosovës, anembanë vendit, Gjakova dha luftëtarë të mëdhenj. Djemtë e vashat e Gjakovës ishin shembulli më i mirë i luftëtarëve të lirisë që nga mobilizimi e deri te dita e fitores”, ka thënë Haradinaj.
Haradinaj ka shtuar se shpirti liridashës e atdhetar i Gjakovës nuk u shua asnjëherë.
Postimi i plotë i Haradinajt në Facebook:
Gjakova, vatër e atdhedashurisë dhe shqiptarisë ndër breza, i fali shumë lirisë së Atdheut. Në Ushtrinë Çlirimtare të Kosovës, anembanë vendit, Gjakova dha luftëtarë të mëdhenj. Djemtë e vashat e Gjakovës ishin shembulli më i mirë i luftëtarëve të lirisë që nga mobilizimi e deri te dita e fitores.
Gjatë luftës për liri, në këtë trevë u shkatërruan shumë ekonomi familjare e shumë vëllezër e motra tona pësuan nga dora e agresorit, por shpirti liridashës e atdhetar i Gjakovës nuk u shua asnjëherë.
Sot në kujtim të Betejës së Çabratit, me kryetarin Ardian Gjini, kolegë e familjarë, nderuam heroizmin e Brigadës 137 “Gjakova” dhe trimat që ranë.
Përgjithmonë krenarë që kisha në krah bashkëluftëtarë si Heronjtë gjakovarë që i kujtuam sot. Përgjithmonë krenarë me heroizmin dhe mirënjohës për sakrificën e popullit tonë për liri.
