Botërori i Futbollit 2026, që do të organizohet për herë të parë në mënyrë të përbashkët nga Shtetet e Bashkuara të Amerikës, Kanadaja dhe Meksika, pritet të mbledhë miliona tifozë nga e gjithë bota.
Megjithatë, festës së futbollit i paraprin një debat delikat: politikat migratore të administratës Trump, që kanë ngjallur shqetësime në mesin e udhëtarëve dhe federatave të huaja.
Në një konferencë për shtypin në Shtëpinë e Bardhë, presidenti Donald Trump, së bashku me anëtarë të kabinetit të tij, u përpoqën të qetësonin situatën dhe të garantonin se SHBA-ja do të jetë një mikpritëse model.
“Ky event do të gjenerojë dhjetëra miliarda dollarë për bizneset lokale dhe do të krijojë mijëra vende pune për amerikanët. Kam urdhëruar ekipin tim të bëjë gjithçka që është në dorën tonë që Botërori të jetë një sukses i paprecedentë. Dhe ashtu do të jetë. Do të kujdesemi që gjithçka të shkojë në mënyrën më të mirë të mundshme,” deklaroi Trump.
Sekretari i Transportit, Sean Duffy, theksoi rëndësinë e respektimit të ligjeve të emigracionit:
“Nëse vini për të parë futbollin, bëni edhe një udhëtim nëpër rrugët e Amerikës, njihni vendin tonë. Por mos qëndroni më shumë sesa lejon viza. Shijoni vizitën, por largohuni në kohë.”
Nga ana tjetër, Kristi Noem, një tjetër zyrtare e administratës, u shpreh se autoritetet do të ndihmojnë vizitorët:
“Do të presim mbi 2 milionë vizitorë ndërkombëtarë. Ne do të kujdesemi për dokumentacionin dhe udhëtimin e tyre. Do të jetë një eksperiencë pa pengesa. Ejani me familjet dhe miqtë tuaj për të festuar këtë ngjarje të jashtëzakonshme.”
Administrata Trump garanton se Departamenti i Shtetit dhe Departamenti i Sigurisë Kombëtare do të punojnë për të siguruar një mbarëvajtje perfekte të turneut, si në aspektin organizativ, ashtu edhe në atë të sigurisë.
Pavarësisht debatit politik, SHBA synon që Botërori 2026 të jetë më i miri në histori, një kombinim i madhështisë sportive me mundësi të reja për turizëm dhe ekonomi.s.net.
