Pas shitjes së Unai Hernández tek Al Ittihad në Arabinë Saudite, Barcelona mund të arkëtojë një tjetër shumë të papritur nga një lojtar që nuk e zotëron më, por mbi të cilin ruan një përqindje të rëndësishme nga një shitje e mundshme në të ardhmen.
Sipas Fabrizio Romano-s, Manchester City i Pep Guardiolës është i interesuar për Nico González, mesfushor i formuar në ‘La Masia’, i cili u shit te Porto në korrik të vitit 2023 për 8.5 milionë euro. Megjithatë, Barcelona ruajti një opsion riblerjeje dhe 40% të një shitjeje të ardhshme.
Negociatat kanë filluar
Sipas raportimeve, bisedimet mes City-t dhe Portos tashmë kanë nisur. Porto, që ka si drejtor sportiv Andoni Zubizarreta-n, nuk do ta lërë të largohet lehtë dhe kërkon një shumë të konsiderueshme, pasi Nico ka një klauzolë lirimi prej 60 milionë eurosh.
Ndërkohë, Manchester City është në kërkim të një mesfushori para përfundimit të merkatos, pasi Guardiola dëshiron të mbulojë mungesën e krijuar nga dëmtimi i Rodrit.
Nico, në formë të shkëlqyer këtë sezon
Nico González, djal i ish-lojtarit të Deportivo La Coruña, Fran González, po kalon një sezon të shkëlqyer me Porton. Ai ka luajtur 29 ndeshje dhe ka shënuar 7 gola, përfshirë një gol të rëndësishëm të enjten e kaluar në Europa League ndaj Maccabi-t, që ndihmoi Porton të kualifikohej në play-off.
Shitja e Nicos, ndihmë për Barcelonën
Nëse kjo marrëveshje finalizohet, Barcelona do të përfitonte një shumë të konsiderueshme, duke rritur fleksibilitetin financiar dhe duke ndihmuar në objektivin për të sjellë Marcus Rashford në huazim para mbylljes së merkatos më 3 shkurt.s.n.
