Krahu ekzekutiv i Bashkimit Evropian do të rekomandojë që vendet anëtare të hapin negociatat e pranimit me Bosnjë-Hercegovinën, tha të martën presidentja e Komisionit Evropian Ursula von der Leyen.
Vendi i Ballkanit Perëndimor është në mesin e gjashtë vendeve – krahas Shqipërisë, Serbisë, Kosovës, Malit të Zi dhe Maqedonisë së Veriut – të cilët janë në faza të ndryshme të procesit të pranimit në BE, pas një periudhe luftërash dhe krizash në vitet 1990.
Anëtarësimet e tyre janë bllokuar prej vitesh. Por pas luftës së Rusisë ndaj Ukrainës, zyrtarët e BE-së janë më të prirur të përpiqen t’i joshin ata nga ndikimi rus, raporton Associated Press.
“Sigurisht, më shumë përparim është i nevojshëm për t’u bashkuar me Unionin tonë,” tha Von der Leyen. “Por vendi po tregon se mund të përmbushë kriteret e anëtarësimit dhe aspiratën e qytetarëve për të qenë pjesë e familjes sonë.
“Mesazhi që vjen nga Bosnja dhe Hercegovina është i qartë. Kështu që edhe mesazhi ynë duhet të jetë i qartë. E ardhmja e Bosnjës dhe Hercegovinës qëndron në Bashkimin tonë.”
Që kandidatët të anëtarësohen në BE, ata duhet të kalojnë një proces të gjatë për të përafruar ligjet dhe standardet e tyre me ato të bllokut dhe për të treguar se institucionet dhe ekonomitë e tyre përmbushin normat demokratike.
Bosnja është ndoshta shteti më i brishtë i Ballkanit, transmeton Klankosova.tv. Tensionet etnike atje kanë vazhduar, shumë kohë pas përfundimit të luftës ndëretnike 1992-95 që vrau më shumë se 100,000 njerëz dhe zhvendosi miliona.
