Presidenti amerikan, Joe Biden, ka dënuar valën e sulmeve raketore ruse që vranë të paktën 41 persona në Ukrainë.
“Ky është një rikujtim i tmerrshëm i brutalitetit të Rusisë”, tha kreu i Shtëpisë së Bardhë duke u zotuar se do të fuqizojë mbrojtjen ajrore të Kievit. Të paktën 166 persona të tjerë mbetën të plagosur në të gjithë Ukrainën, përfshirë disa fëmijë në një spital në kryeqytet.
Bombardimet vdekjeprurëse erdhën ndërsa në Uashington mbahet samiti historik i NATO-s. Presidenti amerikan ka premtuar fuqizim të mbrojtjes së Ukrainës dhe se armë të reja do të dorëzohen në Kiev. Liderë nga 32 vendet anëtare të NATO-s, vendet partnere dhe Bashkimi Europian po mblidhen për të shënuar 75 vjetorin e krijimit të bllokut.
Në event do të jetë i pranishëm dhe presidenti ukrainas, Volodymyr Zelenski, shkruan A2CNN. Samiti do të fokusohet në mbrojtje dhe parandalim në kontekstin e luftës së Rusisë në Ukrainë.
