Vendimi i Presidentit Donald Trump për të pezulluar ndihmën ushtarake për Ukrainën, është përshkruar si “katastrofik” nga një deputet ukrainas, i cili thotë për Sky News se “mijëra njerëz do të vdesin”.
“E kuptoj që kemi një krizë në marrëdhëniet mes dy vendeve tani pas takimit të së premtes në Zyrën Ovale, por thjesht dua t’i kërkoj Donald Trump të rishqyrtojë… ndoshta thjesht të na japë pak kohë për të dalë nga kjo situatë, sepse kjo është katastrofike për ne,” i tha Oleksiy Goncharenko prezantuesit Wilfred Frost.
Ai vazhdoi duke thënë se vendimi i Trump do të trimërojë Putinin, duke e bërë ndarjen edhe më të madhe.
Në një mesazh për Volodymyr Zelenskyy, Goncharenko i bëri thirrje presidentit ukrainas të bëjë “çdo gjë që mundet për të dalë nga kjo” dhe tha “ai duhet të shkojë dhe t’i kërkojë falje” Trump.
“Ne duhet ta shërojmë këtë ndarje, duhet të punojmë së bashku me Amerikën, duhet të jemi bashkë”, tha ai, shkruan A2 CNN.Kur u pyet nëse Volodymyr Zelenskyy duhet të tërhiqej, Goncharenko shpjegoi se Zelenskyy tha se nuk do të kërkonte rizgjedhje pasi të bëhej president në 2019.
“Mendoj se është koha për ta kujtuar këtë dhe ndoshta për të thënë hapur pas përfundimit të luftës se do të ketë zgjedhje dhe mendoj se së paku ai duhet të mendojë të mos kandidojë”, tha deputeti ukrainas.
