Më shumë se 40 njerëz, kryesisht gra, u vranë pasi një minierë e paligjshme ari u shemb në Mali të shtunën.
Shembja ndodhi pranë Kenieba, në rajonin perëndimor të Malit, të pasur me ar.
Viktimat ishin ngjitur në zona të hapura të lëna nga minatorët industrialë për të kërkuar mbetje ari kur toka rreth tyre u shemb, tha për Reuters udhëheqësi i sindikatës së minatorëve të arit.
Ky është aksidenti i dytë vdekjeprurës i minierave në Mali në tre javë, pasi të paktën 10 njerëz u vranë, kur një tunel minierash u shemb në fund të janarit.
Raportet për numrin e saktë të të vdekurve në aksidentin e së shtunës janë kontradiktore.
Një burim i policisë lokale i tha agjencisë së lajmeve AFP se 48 njerëz u vranë nga shembja, ndërsa kreu i një sindikate të industrisë i tha Reuters se kishte 43 viktima.
Mali është një nga prodhuesit më të mëdhenj të arit në botë. Aksidentet janë të zakonshme në vend pasi shumë aktivitete minerare janë të parregulluara, me minatorët që përdorin metoda të pasigurta për të gërmuar për ar.
Një zëdhënës i ministrisë së minierave të vendit konfirmoi për Reuters se aksidenti kishte ndodhur midis qyteteve Kenieba dhe Dabia, por nuk pranoi të jepte detaje të mëtejshme.
Ekipet e ministrisë janë duke përpiluar një raport në vendngjarje, raporton Reuters.
Sipas AFP, shembja ndodhi të shtunën në një vend të braktisur që më parë operohej nga një kompani kineze, rtk.
Pekini kishte investuar shumë në zhvillimin e industrive minerare me miratimin e qeverisë së Malit.
