Kryetari i enklavës serbe në Bosnjë dhe Hercegovinë, e quajtur Republika Serbe, Millorad Dodik, ka paralajmëruar se kjo enklavë do të formojë policinë e saj kufitare.
“Është formuar një Grup Pune, i cila e ka mbajturi takimin e saj të parë për përgatitjen e ligjit që do të rregullojë punën e policisë kufitare në territorin e Republikës Serbe”, ka shtuar Dodik në rrjetin social X.
Ai ka shtuar se një vendim i tillë u mor në takimin e zyrtarëve më të lartë të RS në Banjallukë, duke pretenduar se “korniza ligjore për të cilën po punon Grupi i Punës do të jetë “në përputhje të plotë” me Marrëveshjen e Dejtonit dhe Aneksin 2 të saj (Marrëveshja për vijën ndarëse ndërmjet entiteteve)”.
Ai gjithashtu ka pretenduar se në periudhën nga viti 1996 deri më 2000, kontrollin e kufirit të Republikës Serbe e ka ushtruar policia e Republikës Serbe, dhe se, sipas tij, “në kundërshtim me Marrëveshjen e Dejtonit dhe Kushtetutën e Bosnjës dhe Hercegovinës”, më 13 janar 2000, përfaqësuesi i lartë Wolfgang Petritsch me vendimin e tij “ka imponuar” Shërbimin Kufitar Shtetëror të Bosnjës dhe Hercegovinës
Më pas, Parlamenti i Bosnjës dhe Hercegovinës miratoi Ligjin për Shërbimin Kufitar të Bosnjës dhe Hercegovinës, i cili u mbështet nga partitë e RS, përfshirë Lidhjen e Socialdemokratëve të Pavarur.
Dodik ka thënë se do të mbahet një seancë e mbyllur e Qeverisë së RS, e cila do të shqyrtojë edhe çështje të tjera të situatës politike dhe të sigurisë në Republikën Serbe dhe në Bosnjë-Hercegovinë.
Në këtë seancë, siç është paralajmëruar, do të marrin pjesë ai dhe anëtarja serbe e Presidencës së BeH Zhelka Cvijanoviq.
Pas Dodikut, Kryetarit të Kuvendit të RS, Nenad Stevandiq, dhe Kryeministrit të RS është shpallur një urdhërarrest qendror i Gjykatës së BeH, i cili është dërguar gjithashtu edhe Shërbimit Kufitar të BeH, që do të thotë se policia kufitare ka detyrimin t’i arrestojë ata nëse tentojnë të dalin nga shteti apo të hyjnë në të, shkruan gazeta express.Urdhërarresti është lëshuar pasi ata nuk iu përgjigjën thirrjes së Prokurorisë së Bosnjës dhe Hercegovinës për dëshmi, pasi dyshohen për sulm ndaj rendit kushtetues, pas miratimit të ligjeve nga Kuvendi i RS që ndalojnë veprimtarinë e disa institucioneve gjyqësore dhe policore në territorin e Republikës Serbe.
