Rusia do t’u kursejë jetën ushtarëve ukrainas në rajonin e saj perëndimor të Kurskut, nëse Kievi u thotë atyre të dorëzohen. Ky fakt është bërë i ditur nga Presidenti rus Vladimir Putin. Reagimi vjen pasi Presidenti i SHBA Donald Trump i kërkoi atij të shmangte një “masakër të tmerrshme” në Kurks.
Ukraina mohoi se njerëzit e saj ishin të rrethuar, duke e përshkruar atë si një trillim rus, por presidenti Volodymyr Zelenskiy e quajti situatën “shumë të vështirë”. Trump, në një postim në rrjetet sociale, tha se i kishte kërkuar presidentit rus që t’u kursente jetën mijëra ukrainasve, të cilët ai tha se ishin “plotësisht të rrethuar” dhe të pambrojtur.
“Unë i kam kërkuar me forcë presidentit Putin që t’u kursehet jeta. Kjo do të ishte një masakër e tmerrshme, e paparë që nga Lufta e Dytë Botërore,” tha ai.
Putin, duke iu drejtuar Këshillit të tij të Sigurimit, tha se e kishte lexuar apelin e Trump. Ndërsa akuzoi trupat ukrainase për kryerjen e krimeve kundër civilëve që ai tha se përbënin “terrorizëm” – diçka që Kievi e mohon – Putin tha se e kuptonte thirrjen e Trump për të marrë parasysh konsideratat humanitare.
“Në këtë drejtim, dëshiroj të theksoj se nëse (trupat ukrainase) dorëzojnë armët dhe dorëzohen, atyre do t’u garantohet jeta dhe trajtimi i denjë në përputhje me ligjin ndërkombëtar dhe ligjet e Federatës Ruse”, tha Putin, shkruan A2 CNN.”Për të zbatuar në mënyrë efektive apelin e presidentit të SHBA-së, nevojitet një urdhër përkatës nga udhëheqja ushtarako-politike e Ukrainës që njësitë e saj ushtarake të dorëzojnë armët dhe të dorëzohen.”
Sakqa, sipas njeriut hije të Vladimir Putin, ish-Presidentit Dmitry Medvedev, ushtarët ukrainas në rajonin rus do të Kurskut përballen me asgjësimin nëse nuk dorëzohen. “Nëse ukrainasit nuk dorëzohen në Kursk, ata do të shkatërrohen pa mëshirë”, tha Medvedev, i cili është nënkryetar i Këshillit të Sigurisë Kombëtare.
