Drejtuesit e Telekomit të Kosovës kanë ftuar gazetarët sot në një konferencë të jashtëzakonshme për media, me ç’rast folën për disa vendime të marra nga Gjykata Komerciale, e që sipas tyre janë duke mbrojtur interesat e grupeve të krimit të organizuar dhe po dëmtojë kështu interesin publik.
Kryeshefja ekzekutive e Telekomit të Kosovës, Burbuqe Hana tha se vendimi i marrë nga gjykatësi Hasan Kryeziu është tërësisht antiligjor dhe në kundërshtim të plotë me gjendjet faktike dhe në mosrespektim me të drejtën në gjykim të drejtë e paanshëm sipas vendimit të Gjykatës Kushtetuese.
Ajo tha se pas vendimit të Gjykatës së Arbitrazhit, Telekomi i Kosovës ka paguar shumën prej milionave euro, porse me zvarritjen e procesit edhe nëpër gjykatat vendore janë dhënë miliona euro më shumë se që duhet.
Sipas saj, me të drejtë vendimet e mëparshme kanë vendosur të bëhen ekspertiza financiare, e sipas të cilave duhet t’i kthehen paratë Telekomit të Kosovës.
“Telekomi i Kosovës është dëmtuar prej qindra milionave eurove, por nëse është nevoja do të shkojmë sërish në gjykata relevante edhe ndërkombëtare dhe nuk do të lejojmë që edhe më tutje nga kjo kompania që tani nuk ekziston dhe gjykatës të caktuar vendorë të dëmtohet pasuria publike”, ka theksuar ajo.
Kurse drejtori Financiar i Tdelekomit të Kosovës tha se janë të bindur se në fund do të fitojnë rastin, por rreziku është që nëse Gjykata Komerciale tani merr ndonjë vendim në favor të “Dardafon.net” dhe paratë shkojnë te pronaret e saj.
Ai theksoi se kjo kompani prej vitesh nuk ekziston dhe shkuarja në shkallët tjera të gjykatave mund të sjellë ne situatën kur edhe nëse fitohet rasti nga Telekomi, paratë mund të mos kthehen pasi “Dardafon.net” nuk ka kurrfarë pasurie.
“Pra ne nuk kontestojmë pagesën që ka caktuar Abitrazhi, por kjo që po manipulon gjyqtarja është e papranueshme. Pasi sipas ekspertizës shihet se sa kemi paguar dhe sa para duhet të kthehen”, ka thënë ai.
Ai tha se kanë dyshime që persona nga kompania që i ka marrë me miliona euro nga Telekomi i Kosovës, kanë ndikim të fortë në persona të caktuar në Gjykatë dhe kështu po bën që të merren vendime në favor të tyre.
Kujtojmë se në një komunikatë për media Telekomi i Kosovës ka shfaqur dyshimet e bazuara se individë brenda sistemit të drejtësisë në vend janë shndërruar në instrument të interesave të jashtëligjshme dhe në cenim të pronës së Telekomit të Kosovës.
“Individë brenda sistemit të drejtësisë, brenda Gjykatës Komerciale, Dhoma e Shkallës së Parë, me vendime gjyqësore të vazhdueshme në kundërshtim të plotë me vendimet gjyqësore të niveleve më të larta të gjyqësorit, duke mos respektuar fare procedurat ligjore, po mbrojnë hapur interesat e paligjshme të grupeve të krimit të organizuar, duke u përpjekur që ta dëmtojnë rëndë interesin publik, përkatësisht kompaninë tonë publike.
Kjo përpjekje për të dëmtuar kompaninë tonë po bëhet pikërisht në kohën kur janë duke ndodhur investime të mëdha në infrastrukturën telekomunikuese, përmes të cilave investime qytetarëve tanë do t’u ofrohen shërbime me kualitet të lartë dhe të sigurta. Për më keq, kjo goditje përpiqet të bëhet pikërisht në kohën e festës së Pavarësisë së vendit tonë, duke llogaritur se administrata dhe vendimmarrja ndodhen në pushim”, thuhej në komunikatë.
