Në Francë festojnë faktin që Kylian Mbappé po fillon të tregojë versionin e tij më të mirë me Real Madridin. Kishte dyshime për mënyrën se si do të përshtatej me Vinicius, një tjetër lojtar kyç në sulmin e bardhë, me të cilin më shumë do të konkurronte sesa të bashkëpunonte, pasi të dy janë liderë ofensivë.
Fillimi i vështirë i francezit krijoi pasiguri, duke sjellë shumë kritika për performancën e tij të ulët. Ndërkohë, Vinicius e mbante statusin e tij si lider, por koha ka përmbysur situatën.
Mbappé dhe Vinicius nuk po përshtaten. Shpesh duken si uji dhe vaji, me ndryshimin se francezi ka detyrën të shënojë gola dhe nuk zhgënjen. Ai ka realizuar 23 gola në 33 ndeshje, vetëm një më pak se Vinicius sezonin e kaluar në 39 ndeshje, dhe po aq sa Bellingham. Kylian i ka “rrëmbyer” protagonizmin brazilianit dhe ky i fundit nuk po e përtyp mirë, duke treguar një qëndrim që nuk pëlqehet nga tifozët madrilenë.
Mbappé po shkakton “fikjen” e Vinicius, i cili duket i parehatshëm. Në dukje, francezi po lëkund pozicionin e Vinicius si ‘yll’ i skuadrës, status që nisi të tronditej edhe nga ofertat e mëdha nga Arabia Saudite. Brenda klubit po përhapen dyshime se braziliani mund të mos rinovojë kontratën e tij përtej vitit 2027. Arsyeja mund të jetë financiare, pasi kërkon të fitojë po aq sa Mbappé, por Real Madridi nuk mund të arrijë në ato shifra, pasi ka përfshirë në pagën e francezit një bonus të madh për transferimin e tij si lojtar i lirë.
Real Madridi pagoi mbi 45 milionë euro për ta marrë Vinicius nga Flamengo. Ishte një bast i rrezikshëm, pasi ai ishte vetëm 18 vjeç dhe mund të dështonte, siç ndodhi me Reinier. Klubi i dha hapësirë që të mësonte dhe të kthehej në lider. Ai pati mundësinë të rritej në një ekip fitues, ku figura si Ramos, Kroos, Benzema, Carvajal, Bale dhe Marcelo i treguan rrugën. Vinicius e përthithi këtë mentalitet dhe sezonin e kaluar u shndërrua në liderin e Real Madridit, së bashku me veteranët si Kroos, Carvajal dhe Modric.
Megjithatë, karakteri i tij i fortë dhe pak rebel është bërë më i theksuar, ndoshta i mbështetur nga interesimi i madh i klubeve nga Arabia Saudite. Futbolli i tij, ndërkohë, ka shkuar në rënie, i errësuar nga golat e Mbappé dhe shpërthimi i Rodrygo. Tani, Vinicius gjendet në një situatë të vështirë brenda klubit të bardhë, ku besojnë se është rehatuar shumë me statusin e tij.
Sidoqoftë, Real Madridi ka treguar se asnjë lojtar nuk është më i madh se klubi. ‘Yjet’ vijnë dhe ikin, ndërsa ekipi mbetet gjithmonë në majë. Këtë e ka provuar edhe Cristiano Ronaldo. Nëse Vinicius nuk gjen mënyrën për t’u përshtatur, Real Madridi nuk do ta ketë të vështirë ta harrojë.s.n.
