Lidhja Demokratik e Kosovës të mërkurën ka prezantuar listën finale të kandidatëve për deputet nga radhët e LDK-së, për zgjedhjet parlamentare të 9 shkurtit, por jashtë kësaj liste ka lënë Agim Veliun, politikanin që para pak kohësh ishte ndër figurat kryesore të partisë.
LDK ka vendosur që kandidat për deputet nga Podujeva të jenë: Ekrem Hyseni, Fatlume Jaha, Fehmi Zeqiri, Mustafe Abazi dhe Qëndrim Softolli.
Pas vendimit të Këshillit të Përgjithshëm të LDK-së, për mos përfshirjen e Agim Veliut në listë, Telegrafi ka kontaktuar me të, i cili edhe kritikoi udhëheqjen e partisë.
“Vendimi është marrë nga ata që aksidentalisht janë në krye të partisë”, u shpreh shkurtimisht ai.
Agim Veliu kishte qenë kryetar i Podujevës për disa mandate, ai po ashtu është deputet i Kuvendit të Kosovës. Para pak kohësh, Veliu kishte deklaruar se “për të gjithë ata që pretendojnë që në çfarëdo forme të më shohin jasht LDK-së, e kam një porosi: askush dhe asnjë forcë nuk mund ta largojë Agim Veliun nga LDK-ja”.
Ndryshe, LDK tashmë ka nisur takimet me qytetarë për zgjedhjet parlamentare të 9 shkurtit, duke prezantuar programin e partisë dhe kandidatët për deputet.
