Zëvendës Ndihmës Sekretari i SHBA-ve për Çështjet Evropiane, Gabriel Escobar, e vlersësoi si historike marrëveshjen e arritur mes Kosovës dhe Serbisë në Ohër të Maqedonisë së Veriut.
Por të njëjtin mendim me Escobar nuk e ndanë, bashkëpunëtori i lartë i Këshillit për Politikat e Demokratizimit në Berlin, Bodo Weber.
Weber vlerëson se marrëveshjet karakterizohen me më shumë paqartësi sesa që në të vërtetë janë historike.
“Marrëveshja e Brukselit edhe aneksi i zbatimit të Ohrit karakterizohen me më shumë paqartësi sesa që janë vërtet historike. Janë lënë të hapura shumë pyetje në lidhje me zbatimin e marrëveshjeve të reja si dhe marrëveshjeve të vjetra, ndërsa në veri të Kosovës situata vazhdon të jetë komplekse”, ka thënë Weber për Tëvë 1.
Njohësi i çështjeve politike për Ballkanin Perëndimor, Bodo Weber, nuk e përjashton mundësinë që procesi i dialogut të dështoj tërësisht, për shkak se në veri të vendit është një situatë tepër e ndjeshme, dhe Perëndimi nuk ka arritur të siguroj pjesëmarrjen e Listës Serbë në zgjedhjet lokale që do të mbahen këtë diele.
“Duke qenë se para çdo fillimi të zbatimit ne përjetojmë një përshkallëzim të ri, të mëtejshëm në veri, nuk mund të përjashtohet plotësisht si mundësi që i gjithë procesi të shembet. Fakti që do të shohim zgjedhje në veri pa e siguruar Perëndimi pjesëmarrjen e Listës Serbe tregon qartë se dialogu nuk është në rrugën e duhur. Në këtë sfond, takimi i 2 majit në Bruksel duket më shumë si një takim tjetër krize, e jo një takim për zbatimin e marrëveshjes”, është shprehur ai.
Takimi i ardhshëm i nivelit të lartë mes dy delegacioneve do të zhvillohet me 2 maj në Bruksel.
Ndërmjetësit e këtij procesi po presin hapa konkretë nga palët në vënien në zbatim të pikave të marrëveshjes.
