Do të ketë një prani të madhe policore, por pak tifozë vizitorë në ndeshjen e futbollit të mbrëmjes së sotme mes Francës dhe Izraelit në Ligën e Kombeve.
Autoritetet në Paris janë në gatishmëri të lartë mes një klime politike gjithnjë e më të tensionuar.
Shefi i policisë franceze Laurent Nunez tha se 4,000 oficerë policie dhe staf sigurie do të vendosen rreth stadiumit “Stade de France”, me 1,500 policë të tjerë në transportin publik.
Masat ekstreme vijnë një javë pas dhunës kundër tifozëve izraelitë rreth një ndeshje futbolli të Ligës së Evropës në Amsterdam në sulme të dënuara gjerësisht në të gjithë Evropën si antisemite.
Tre muaj pas organizimit të ceremonisë së mbylljes së Olimpiadës , atmosfera ka kaluar nga festive në të frikshme dhe stadiumi kombëtar pritej të ishte tre të katërtat bosh për ndeshjen.
Të pranishëm do të jenë presidenti francez Emmanuel Macron dhe ministri i Brendshëm francez Bruno Retailleau.
Vetëm 20,000 nga 80,000 bileta janë shitur me rreth 150 mbështetës të Izraelit që thuhet se kanë marrë pjesë, të shoqëruar nga policia.
“Jemi përpjekur të përgatitemi për këtë ndeshje sa më normalisht. Por padyshim që asnjë prej nesh brenda ekipit nuk mund të jetë i pandjeshëm ndaj një konteksti kaq të rëndë”, tha të mërkurën trajneri i Francës, Didier Deschamps.
Ndeshja jashtë fushe kundër Izraelit më 10 tetor, të cilën Franca e fitoi 4-1, u luajt në Budapest, Hungari.
“Këto janë situata me të cilat lojtarët nuk janë mësuar”, tha Deschamps. “Por ne duhet të përshtatemi.”
Numri i ulët i tifozëve vizitorë vjen pasi Këshilli i Sigurisë Kombëtare i Izraelit paralajmëroi qytetarët jashtë vendit që të shmangin ngjarjet sportive dhe kulturore, veçanërisht ndeshjen në Paris.
Retailleau i tha kanalit francez të lajmeve TF1 të martën se nuk u identifikuan kërcënime specifike, por “rreziku zero nuk ekziston”.
Prandaj, tha ai, janë vendosur masa të jashtëzakonshme “para ndeshjes, gjatë ndeshjes dhe pas ndeshjes”.
Njësia elitare taktike e Policisë Kombëtare Franceze, e njohur si RAID, do të jetë në stadium dhe disa policë do të jenë me rroba civile duke u përzier me tifozët.
Do të ketë gjithashtu mbikëqyrje të rëndë brenda Parisit, duke përfshirë vendet e adhurimit hebre.
“Nuk bëhet fjalë që ne të rrezikojmë të shohim një përsëritje të ngjarjeve dramatike, të gjuetisë njerëzore, që pamë në Amsterdam”, tha Retailleau, duke shtuar se shtyrja ose zhvendosja e lojës diku tjetër ishte përjashtuar.
“Franca nuk tërhiqet”, tha ai. “Franca nuk dorëzohet dhe ndeshja Francë-Izrael do të zhvillohet aty ku është menduar”.
Mbrëmjen e së enjtes së kaluar, Amsterdami dëshmoi skena kaosi kur tifozët izraelitë u sulmuan nga një mori të rinjsh të inatosur me sa duket nga thirrjet në mediat sociale për të shënjestruar hebrenjtë, sipas autoriteteve holandeze.
Para ndeshjes, një grup i madh mbështetësish të ekipit izraelit mund të shihej në video duke brohoritur parulla anti-arabe teksa po shkonin drejt stadiumit, të shoqëruar nga policia.
Protestat shpërthyen në Paris të mërkurën mbrëma kundër një gala të diskutueshme të organizuar nga figura të ekstremit të djathtë në mbështetje të Izraelit.
Ndeshja në Saint-Denis, periferia në veri të Parisit ku ndodhet stadiumi, është planifikuar të fillojë në orën 20:45 me orën lokale (1945 GMT) të enjten.
Nëntë vjet më parë, “Stade de France” ishte një nga disa lokacione gjatë sulmeve terroriste të 13 nëntorit, ku humbën jetën 130 persona.
Franca po luante me Gjermaninë atë natë kur dy shpërthime ndodhën jashtë stadiumit.
Deschamps, trajneri i Gjermanisë, Joachim Low dhe të gjithë lojtarët qëndruan së bashku në dhomat e zhveshjes për orë të tëra derisa u bë e sigurt për t’u larguar.
“Është një datë e trishtuar për ne duke pasur parasysh atë që ndodhi në vitin 2015”, tha Deschamps.s.n.
