Shefi i Grupit Parlamentar të LDK-së, Arben Gashi ka deklaruar se në mbledhjen e mbajtur sot për kryesinë e partisë u fol për Ligjin e Rimëkëmbjes Ekonomike, shkruan Kosova Post.
Gashi shtoi se po shpresojnë që ky ligj do të kalojë këtë javë.
“Ligji për Rimëkëmbje Ekonomike shpresojmë se do të kalojë këtë javë”, tha Gashi.
Ai tutje shtoi se rezultati i zgjedhjeve në Podujevë ishte jo i kënaqshëm për LDK-në dhe se normalisht do të merren me këtë për ti evituar problemet në zgjedhjet e ardhshme.
“Rezultati i Podujevës është një rezultat jo i kënaqshëm për ne dhe normalisht do të merremi me analiza për t’i evituar problemet në zgjedhjet e ardhshme”, shtoi Gashi.
I pyetur se a i humbën zgjedhjet në Podujevë për shkak të deklaratave të zëvendëskryeministrit Driton Selmanaj ndaj deputetes së Lëvizjes Vetëvendosje, Saranda Bogujevcit, Gashi ka thënë se këto gjëra nuk mund të personalizohen.
“Nuk mendoj se personalizohen kaq thjesht gjërat. Sigurisht se në proces ka ndodhur diku një shkëputje dhe do ta shikojmë” u shpreh Gashi.
