Ministra e Shëndetësisë njofton për investime në dy salla operative në Neurokirurgji dhe Kirurgji Vaskulare në QKUK, duke i bërë këto, nga sallat me mungesë të kushteve elementare, në salla të kompletuara si në aparaturë ashtu edhe në infrastrukturë moderne, transmeton KosovaPost.
“Për herë të parë do të ketë filtra steril, të cilët do të ndikojnë drejtpërdrejtë në reduktimin e infeksioneve intrahospitalore. Pra, kushtet moderne e me standarde të larta. Përmes investimeve janë shtuar edhe shërbime të reja, fatkeqësisht të munguara deri më tani në Qendrën Klinike Universitare të Kosovës’, thuhet në njoftimin e MSH-së.
Me aparatura të reja e moderne të gjeneratës së fundit, pacientëve thuhet se do t’u mundësohet trajtim pa pasur nevojë për ndërhyrje të hapura operative, e cila “rritë cilësinë e shërbimit dhe saktësinë në punë për mjekët në njërën anë dhe siguri më të madhe për pacientët në anën tjetër”.
“Investimi për transformimin rrënjësor në infrastrukturë dhe aparaturë ka vlerë rreth 3 milionë euro. Ndërsa, për një vit për trajtim mjekësor të pacientëve jashtë institucioneve shëndetësore publike janë shpenzuar 3 milionë”, thuhet në njoftimin e Ministrisë së Shëndetësisë.
Kjo e fundit thuhet se mbetet e përkushtuar për ofrimin e kushteve sa më të mira për qytetarët në institucionet e saja publike.
