Serbët nuk kanë pranuar të flasin rreth shfaqjes së flamurit skandaloz në dhomën e tyre të zhveshjes nga ndeshja Brazil – Serbi, që u zhvillua të enjten mbrëma.
Në dhomën e Përfaqësueses së Serbisë u shfaq një flamur me ngjyrat e këtij shteti, si dhe hartën e Republikës së Kosovës në të.
Në këtë flamur ishte një mbishkrim ku thuhej “Nuk ka dorëzim”. Flamuri i njëjtë u shfaq edhe nga tifozët.
FIFA njoftoi këtë të shtunë se ka nisur tashmë hetimet, duke hapur procedurë disiplinore për Federatën e Futbollit të Serbisë.
Gjatë ditës të sotme Marko Grujic u paraqit në një konferencë për media, aty ku nuk shpëtoi pa u pyetur rreth rastit në fjalë.
Neil Barker, gazetari nga “Associated Press”, u interesua për rastin në fjalë, teksa provoi të merrte një koment nga Grujic. “Pse lojtarët zgjodhën ta vendosin atë flamur në dhomën e zhveshjes”, ishte pyetja e Barker.
Megjithatë, zyrtari për media nga Federata serbe, Milan Vukovic, reagoi menjëherë duke mos lejuar që mesfushori i Portos të përgjigjej.
Vukovic tha para gazetarëve se “do të diskutohet vetëm për duelin me Kamerunin”.
“I’m sorry the player won’t answer that question”
I asked Serbia player Marko Grujic about the team’s “no surrender” Kosovo flag….The question was shut down by their press officer…#FIFAWorldCup https://t.co/AcVTc6iRNs pic.twitter.com/8WdH8QN6U7
— Neil Barker (@Mockneyrebel) November 26, 2022
