Korrespondenti i gazetës së përditshme Die Tageszeitung (taz) Erich Rathfelder, i cili ka raportuar ngjarje nga Ballkani për lexuesit në Gjermani që nga fillimi i viteve 1990, foli për rritjen e grupeve të krahut të djathtë në Evropë dhe pasojat që mund të ketë kjo, transmeton Kosova Post.
Për sa i përket nacionalizmit, Ballkani është përpara dhe Evropa fatkeqësisht po merr shumë shembuj të këqij. Mund ta marrësh me ironi, por kjo po ndodh në të vërtetë ”, tha Rathfelder.
Ai e ka shpjeguar këtë përmes fenomenit të lajmeve të rreme, duke thënë se një mënyrë e tillë e ndikimit në publik është shpikur në kohën e Sllobodan Millosheviqit dhe se është një problem me të cilin vendet e BE-së po përballen vetëm tani.
Rathfelder pohon gjithashtu se presidenti rus Vladimir Putin mbështeti financiarisht mediat në Ballkanin Perëndimor për lajmet e rreme, ndërsa në Evropë, mbështeti financiarisht procesin e grumbullimit të lëvizjeve të krahut të djathtë, të gjitha me qëllim të “shkatërrimit të BE-së”, dhe citon një sërë arsyesh pse ai ishte pjesërisht i suksesshëm.
Përshembull, në Ballkanin Perëndimor, në Republikën e Kosovës “Zonat serbe, komunitetet serbe kanë pavarësinë dhe të drejtat më të mëdha, krahasuar me të gjitha pakicat në Evropë. Komunat janë të lira, mund të përzgjedhin gjuhën e tyre, kanë lirinë e arsimit, trajtimin mjekësor përmes strukturave të tyre, pra kjo orvatje për të themeluar një Republikë serbe të tyre brenda Kosovës, për mua është një hap në drejtim të shkatërrimit të Kosovës nga pala serbe”, tha gazetari i njohur gjerman, Erich Rathfelder.
