Zëvendëskryeministrja dhe ministrja e Punëve të Jashtme dhe Diasporës, Donika Gërvalla, pati me ministrin e Jashtëm të Kroacisë, Gordan Grlić-Radman, në Forumin e Dubrovnikut, me të cilin ka biseduar mes tjerash për fuqizimin e bashkëpunimit në proceset e integrimit euroatlantik të Kosovës, iniciativat e përbashkëta rajonale, bashkëpunimin në siguri, mbrojtje e shkëmbime tregtare.
Përmes një njoftimi për medie, bëhet e ditur se në takimin bilateral të mbajtur në Forumin e Dubrovnikut, ministrja Gërvalla shprehu mirënjohjen ndaj Kroacisë për mbështetjen e madhe që i ka dhënë Republikës së Kosovës në procesin e anëtarësimit të Kosovës në Këshillin e Evropës, duke deklaruar që ky proces duhet të finalizohet sa më shpejtë me anëtarësimin e plotë në KiE.
“Ministrja Gërvalla në takim me ministrin Radman foli edhe rreth veprimeve destabilizuese të Serbisë në rajon dhe nevojën e rritjes së bashkëpunimit mes shteteve pro perëndimore të Ballkanit Perëndimor në ruajtjen e paqes dhe stabilitetit”, thuhet në njoftim.
