Ministrja e Jashtme dhe Diasporës Donika Gërvalla, ka deklaruar për televizionin publik gjerman se nëse bashkësia ndërkombëtare e toleron, presidentin e Serbisë Aleksandar Vuçiq, dhe të ketë qasje të njëjte me të mund të ketë luftë.
Ajo deklaroi se “ministri i Propagandës së Millosheviqit e di mirë se si t’i shfrytëzojë gabimet e perëndimit”.
“Kjo nuk është hera e parë që Vuçiqi sjell trupat ushtarake në kufi me Kosovën. Kjo nuk është hera e parë që ai kërcënon me luftë”, tha Gërvalla.
Kryediplomatja kosovare shtoi se Vuçiq po dëshiron t’i bëjë presion Qeverisë së Kosovës për të negociuar për territore.
“Presidenti serb ka treguar para tetë ditësh se cili është plani i tij dhe plani i tij është okupimi i një pjese të Kosovës”, tha ajo.
“Kjo s’do të ndodhë. Kjo përpjekje ka dështuar dhe si shkak i kësj një polic i yni është vrarë. Dhe grupi terrorist ka qenë i përgatitur për të kryer një sulm me 400 persona. Dhe, për fat të mirë kjo ka dështuar dhe ne nuk e dimë se cili është plani i tyre për të ardhmen”, theksoi kryediplomatja kosovare.
Këto deklarime e para e MPJD-së i bëri një javë pas sulmit terrorist serb mbi policinë e Kosovës, si pasojë e të cilës u vra rreshteri policor Afrim Bunjaku.
Presidentja e Kosovës, Vjosa Osmani së fundmi tha se Serbia vazhdon të ketë pretendime territoriale ndaj Kosovës. Qeveria në Beograd po përpiqet të zbatojë një “model të Krimesë”, tha ajo, duke aluduar në aneksimin e vitit 2014 nga Rusia në Ukrainë.
