Anëtarët e Partisë Social Demokratike të Gjermanisë (SPD) me një shumicë dërrmuese kanë miratuar një marrëveshje koalicioni me kristiandemokratët konservatorë (CDU/CSU), duke i hapur rrugën një qeverie të re.
Transmetuesi publik ARD raportoi se gjithsej 84,6 për qind e anëtarëve të SPD-së votuan në favor të marrëveshjes së koalicionit në një votim online që përfundoi mbrëmë, duke cituar burime të partisë. Votimi kaloi me një shkallë të pjesëmarrjes prej 56 për qind, shumë mbi pragun minimal të kërkuar prej 20 për qind, me çka rezultati bëhet i detyrueshëm për udhëheqjen e partisë.
Sekretari i përgjithshëm i SPD-së, Matthias Miersch do të mbajë konferencë për media sot më vonë për të njoftuar rezultatet zyrtare.
Unioni Kristian Demokrat (CDU) i kancelarit të paracaktuar Friedrich Merz miratoi marrëveshjen e koalicionit të hënën në një konferencë të posaçme të partisë në Berlin. Partia simotër bavareze e CDU-së, Unioni Kristian Social (CSU), e miratoi marrëveshjen në fillim të këtij muaji.
Pas miratimit nga SPD-ja, siç është planifikuar, udhëheqësit e partive do të nënshkruajnë marrëveshjen e koalicionit të hënën e ardhshme në Berlin. Parlamenti do të mblidhet më pas më 6 maj për të zgjedhur Merz-in si kancelar, duke zëvendësuar Olaf Scholz-in.
Kristiandemokratët (CDU/CSU) fituan 28,5 për qind të votave në zgjedhjet e parakohshme të muajit shkurt, por nuk arritën shumicën absolute, transmeton Anadolu. Pavarësisht se social demokratët morën rezultatin e tyre më të ulët ndonjëherë prej 16,4 për qind, ata dolën si një partner i rëndësishëm koalicioni. Së bashku, partitë do të kontrollojnë 328 vende në parlament, duke kaluar pragun prej 316 vendesh që nevojiten për një shumicë qeverisëse.
