Harry Kane ka qenë një nga figurat kyçe të sezonit 2024/25 në Gjermani, duke fituar trofeun e tij të parë madhor në nivel klubesh, duke ruajtur kurorën si golashënuesi më i mirë i Bundesligës dhe tani edhe duke u shpallur “Lojtari i Sezonit” në elitën gjermane. Një sezon i jashtëzakonshëm për kapitenin e Anglisë.
“Të shpallesh Lojtari i Sezonit është një arritje e madhe. Kjo është një ligë me futbollistë të jashtëzakonshëm. Ta fitosh këtë çmim në të njëjtin vit kur kemi fituar edhe titullin e Bundesligës e bën akoma më të veçantë,” u shpreh Kane pas marrjes së çmimit. “Një falënderim i madh për klubin, për bashkëlojtarët e mi dhe për të gjithë stafin. Pa ta, kjo nuk do të ishte e mundur. Do ta shijoj këtë moment, sepse kam punuar shumë gjatë gjithë sezonit dhe një vlerësim si ky është një bonus i merituar.”
Sulmuesi anglez realizoi 26 gola për Bayernin këtë sezon, duke u bërë lojtari i parë në historinë e Bundesligës që shpallet golashënuesi më i mirë në dy sezonet e tij të para në këtë kampionat. Përveç golave, Kane regjistroi edhe 8 asistime, duke e çuar në 34 numrin total të kontributeve të drejtpëdrejta në gola, më pak vetëm se Mohamed Salah i Liverpoolit (46) në ligat kryesore evropiane për sezonin 2024/25.
Pasi ka fituar një sërë çmimesh individuale në karrierën e tij, përfshirë “Këpucën e Artë” të Europës sezonin e kaluar, Kane më në fund ka vënë duart mbi një trofe të madh në nivel skuadre, duke udhëhequr Bayernin drejt titullit kampion të Gjermanisë.s.n.
