Vendimin e Gjykatës Kushtetuese për të shpallur Ligjin për Këshillin Prokurorial të Kosovës kundër kushtetues, nuk e pritën mirë drejtues të institucioneve. Haxhiu e quajti absurd vendimin duke thënë se Kushtetuesja ka injoruar në tërësi të dy opinionet e Komisionit të Venecias në lidhje me këtë ligj. Ndërkaq, PDK vlerëson se ky vendim është fitore e madhe për shtetin e së drejtës e LDK e quan monisten shkelëse të Kushtetutës.
Ministrja e Drejtësisë, Albulena Haxhiu ka shprehur pakënaqësinë e saj në aktvendimin e Gjykatës Kushtetuese, e cila e shpalli të pavlefshëm Ligjin për Këshillin Prokurorial të Kosovës.
Haxhiu, tha se kushtetuesja ka injoruar në tërësi të dy opinionet e Komisionit të Venecias në lidhje me këtë ligj duke i dhënë një goditje të rëndë Kosovës por edhe duke penguar reformën në drejtësi.
Ministrja u shpreh se qëllimi i institucionit që drejton ka qenë që me këtë ligj ta reformojë KPK-në për të eliminuar grupet e interesit e korporatizmin.
Sipas ministres për Gjykatën Kushtetuese më i rëndësishëm është interesi individual, dhe jo interesi i përgjithshëm.
Por, ndryshe ishin reagimet e opozitës.
Shefi i grupi parlamentar të Partisë Demokratike e Kosovës, Ambelard Tahiri, përmes një konference për media, ka thënë se mirëpret vendimin e Gjykatës Kushtetuese dhe vlerësojnë se kanë arritur ta mbrojnë rendin kushtetues të vendit nga, siç e quajti ai, tendencat e qeverisë dhe kryeministrit Albin Kurti për ta vënë nën kontroll Këshillin Prokurorial të Kosovës.
Edhe Avokati i PDK-së, Faton Fetahu, si hartues i këtij rasti në Gjykatën Kushtetuese, ka thënë se ligji i rrëzuar nga Gjykata Kushtetuese prekte në thelb funksionimin e rendit kushtetues të vendit.
Edhe deputetja e LDK-së, Doarsa Kica Xhelili, ka reaguar në lidhje me atë se çfarë tha sot në konferencë ministrja e Drejtësisë, Albulena Haxhiu, në lidhje me Gjykatën Kushtetuese.
Ajo e quajti Haxhiun shkelëse të Kushtetutës.
“Kjo Gjykatë Kushtetuese (GJK) ka rrëzuar Qeverinë Hoti – vendim që i shkoi për shtat asokohe ministres Haxhiu. Kjo GJK ka gjetur me të drejtë 22 shkelje në marrëveshjen për Asociacionin – që i shkoi për shtat gjithë VV-së si pretekst se në pushtet kishim shkelës të Kushtetutës. Por – kur e njëjta Gjykatë ka filluar t’i evidentoj shkeljet e Ministres Haxhiu, ajo paska filluar të befasohet. Paska filluar ta vë në pyetje kredibilitetin e GJK. Natyrisht. Sepse sot, ajo është zyrtarisht shkelësja e Kushtetutës që dikur e përçmonte si tradhti kombëtare – dhe i dhemb rruga që ka shtruar vet me kolegë”, ka thënë Kica Xhelili.
Gjykata Kushtetuese të premten ka vendosur që ta shpallë të pavlefshëm Ligjin për Këshillin Prokurorial të Kosovës, pas kërkesës për vlerësim të kushtetutshmërisë së këtij ligj nga deputetët e Lidhjes Demokratike të Kosovës dhe Partisë Demokratike të Kosovës./
