Sondazhi i publikuar mbrëmë në TV Dukagjini nuk është bërë nga Instituti Riinvest por nga Kolegji Riinvest, njofton Kosova Post.
Këtë sqarim për opinionin publik, Instituti Riinvest e ka bërë ditën e sotme, përmes faqes zyrtare të tyre në Facebook.
Ndër të tjera në sqarim ata theksojnë se Instituti Riinvest është themeluar në vitin 1995 dhe është entitet i ndarë nga Kolegji Riinvest dhe funksionojnë ndamas.
Njoftimi i plotë:
SQARIM PËR OPINIONIN PUBLIK
Pas prezantimit të rezultateve të një sondazhi në radiotelevizionin Dukagjini, në emisionin Debat Plus, mbrëmë me datë 19 Janar 2021, Instituti Riinvest sqaron opinionin publik me sa vijon. Sondazhi në fjalë është kryer nga Kolegji Riinvest dhe jo nga Instituti Riinvest. Ky sqarim vjen pas evidentimit të rasteve kur disa media dhe qytetarë i referohen këtyre dy institucioneve si sinonime. Këto entitete janë të ndryshme dhe të pavarura; Instituti Riinvest është organizatë jo-qeveritare që nga themelimi i tij në vitin 1995.
Instituti RIINVEST
