Ai që dikur kumtonte lajme nga selia e NATO-s që e tronditnin pushtetin e Milosheviqit në Beograd, sot po i bën thirrje Kosovës që t’i dëgjojë miqtë ndërkombëtar.
Eksperti i çështjeve të sigurisë i ka dënuar sulmet e protestuesve serb ndaj forcave të KFOR-it si dhe ndaj Policisë së Kosovës.
Jamie Shea kërkon që ata persona të sillen para drejtësisë, ndërsa i bënë thirrje Presidentit Vuçiq që të tregoj lidership dhe ta qetësoj komunitetin serb në Kosovë.
“ Dhuna e protestuesve serb ndaj ushtarëve të KFOR-it dhe Policisë së Kosovës duhet të dënohet. Me dhjetëra ushtarë të KFOR-it janë lënduar, ata persona që i kanë bërë këto veprime duhet të identifikohen dhe të sillen para drejtësisë. Kjo është e papranueshme, po e përsëris e papranueshme. Ushtarët e KFOR-it janë aty për të gjithë qytetarët e Kosovës, ata nuk janë kundërshtarë të komunitetit serb. Në anën tjetër Vuçiq bënë mirë që ta ndërpres retorikën e luftës, me sa kam kuptuar ai ka kaluar natën me ushtrinë e tij në kufi, me të vërtetë është duke e ekzagjeruar me këto veprime. Ai duhet të tregoj lidership dhe t’i bëjë thirrje protestuesve serb që të qetësohen”, ka thënë ai për Tëvë1
Shea i ka bërë thirrje edhe kryeministrit Albin Kurti që t’i dëgjojë miqtë ndërkombëtar, që sipas tij ja duan më të mirën vendit.
Tutje, ai ka treguar se cila do të ishte zgjidhja më e mirë politike në këtë fazë në katër komunat veriore.
“Ka kriza të vazhdueshme në veriun e Kosovës, prandaj është e rëndësishme që në këtë periudhe të qetësohet situata. Të jemi të sinqertë pjesëmarrja në këto zgjedhje ishte e ulët, ishte vetëm 3.5%. Prandaj po them se në këtë fazë duhet një periudhe qetësie dhe serbët dalëngadalë të fillojnë të kthehen në institucione. Mendoj se në këtë fazë do të ishte më së miri që të kishte një qeverisje teknike ne katër komunat veriore deri sa të bëhet një zgjidhje më afatgjate. Është një situatë tepër serioze kështu që nuk duhet të ketë veprime të njëanshme. Kosova ka shumë miq prandaj duhet t’i dëgjoj ata sepse ja duan më të mirën”, është shprehur ai.
Situata në veriun e Kosovës vazhdon të jetë e tensionuar. Serbët lokal, me mbështetjen e Beogradit nuk po lejojnë që kryetarët e zgjedhur në katër komunat veriore, edhe pse me legjitimitet të kontestuar për shkak të pjesëmarrjes minimale të votuesve në zgjedhje, që të hyjnë në zyrat e tyre për të ushtruar detyrat dhe përgjegjësitë që kanë.
