Një tender i shpallur nga Ministria e Integrimeve në qershor të vitit 2019, synonte një fushatë mediale për informimin e qytetarëve rreth integrimit evropian, liberalizimit të vizave e Marrëveshjes së Stabilizim Asociimit. Por, tenderi që kapte vlerën e gati 900 mijë eurove u shfrytëzua edhe për diçka tjetër. Prokuroria e Shtetit po e akuzon ish-ministren e Integrimeve, Dhurata Hoxha se me këto mjete, bëri fushatë për zgjedhjet e 6 tetorit 2019, ku kishte kandiduar për deputete nga PDK-ja.
Kompania fituese kishte për detyrë marrëveshjet me media të ndryshme, realizimin e videove, kampanjave me qëllim të informimit të qytetarëve për integrimin evropian, liberalizimin e vizave e MSA-në. Por, shpallja e zgjedhjeve nga presidenti për 6 tetor 2019, bëri që kjo kontratë të devijonte. Sipas aktakuzës së Prokurorisë, ish-ministrja e Integrimeve, Dhurata Hoxha e kishte shfrytëzuar këtë kontratë, për të bërë fushatë për zgjedhjet parlamentare, ku ajo kishte kandiduar për deputete.
Përveç Dhurata Hoxhës, të akuzuar janë edhe Fitim Mustafa, Gëzim Dushi e Ekrem Tahiri. Të njëjtit dyshohen se e kanë dëmtuar buxhetin e Kosovës në vlerë 143 mijë euro, për periudhë gusht-tetor 2019.
“Duke vepruar në kundërshtim me dispozitat ligjore që rregullojnë detyrat dhe përgjegjësitë e saj si ministre, i kishte shfrytëzuar në mënyrë të kundërligjshme dhe me qëllim të promovimit të fushatës zgjedhore të saj për mandatin e deputetes në zgjedhjet parlamentare të mbajtura më 6 tetor 2019, e që përfshinin kryesisht publikimin e banerëve, artikujve dhe video-spoteve që vinin në pah dhe në qendër të vëmendjes të pandehurën Dhurata Hoxha dhe emrin e saj, të arriturat dhe synimet e saj, e që ishin në kundërshtim me kontratën e nënshkruar, duke mundësuar kështu për veten e saj përfitim të padrejtë në dëm të buxhetit të Kosovës shumën prej 143 mijë eurove”, thuhet në aktakuzën e siguruar nga nacionale.
“Nga provat e dhëna do të vërehet se, menjëherë pas nënshkrimit të kontratës, në një kohë kur nga dita në ditë pritej të shpalleshin zgjedhjet e jashtëzakonshme parlamentare të Kosovës pas rënies së qeverisë së atëhershme, kishin filluar përgatitjet e menjëhershme për implementimin e kontratës në fjalë. Një përputhje e tillë e periudhës kohore të nënshkrimit të kontratës me përgatitjet për shpallejn e zgjedhjeve do të mbetej koinçidencë sikur akterët përgjegjës për implementimin e kontratës, secili nga të pandehurit, nuk do të ndërhynin për t’i ndryshuar kushtet e përcaktuara në kontratë sin ë lidhje me përmbajtjen, po ashtu edhe me periudhën implmentuese”, theksohet më tej.
Prokuroria përmend disa raste ku në zbatimin e kontratës, vërehej më shumë promovim i Dhurata Hoxhës se sa i Kosovës dhe integrimeve evropiane. “Një CD përmban videoincizim me kohëzgjatje 5 orë me një reportazh ku Hoxha thotë se fuqizimi i gruas është prioritet i saj. Nga reportazhi mund të shihet se në qendër të vëmendjes është Dhurata Hoxha, e cila takohet me udhëheqëset e OJQ-së Qendra në Drenas. Një CD që përmban videoincizim me kohëzgjatje 10 orë ku Hoxha flet për rininë. Nga reportazhi shihet se në qendër është sërish Dhurata Hoxha”.
Në fakt, Prokuroria e Kosovës ka gjetur dyshime se dallaveret me tenderin për shërbime të informimit publik, kishin nisur qysh në fillim. Kjo pasi, komisioni vlerësues e kishte përzgjedhur fituese kompaninë PR Solutions, e cila kishte pasur ofertë për gati 200 mijë euro më të shtrenjtë. Kjo ishte mbështetur në një kriter që fillimisht nuk ishte e parapraë në kushtet e tenderit: angazhimi i stafit për 8 orë punë rregullisht. Këtë kusht që nuk ishte në dosje të tenderit nuk e kishte përmbushur kompania “2B”, e cila kishte pasur ofertën 688 mijë euro, për dallim nga 881 mijë të kompanisë e cila fitoi tenderin.
“Arsyetimi për eleminimin e operatorit 2B se gjoja nuk ka ofruar deklaratë që stafi të jetë në dispozicion për 8 orë në rast se kërkohet, konsiderohet justifikim i paarsyeshëm pasi një këkresë e tillë nuk ka qenë e paraparë në dosjen e tenderit dhe si e tillë nuk ka mundur të merret si arsyetim për ta eleminuar ndonjërin nga operatorët. Marrja për bazë e një kriteri që nuk ka qenë i përcaktuar në dosje dhe në njoftim, ka ndikuar që AK ta shpërblejë me kontratë Operatorin që kishte çmim më të lartë 192 mijë euro”, thuhet në aktakuzën e Prokurorisë.
Gjatë procedurave, ishte evidentuar gjithashtu parregullsi në zbatimin e kontratës, dhe marrëveshjet me mediat. “Fatura është 45 mijë e 500 euro në muaj për 17 portale, e në kontratë ne e kemi shifrën prej 50 portalesh për bashkëpunim. Në bazë të kalkulimit ne nuk po arrijmë ta kuptojmë si është arritur ky total kur çmmi për njësi është 8 mijë e 260 euro”, thuhet në një nga Emailet e dëshmuara në aktakuzë.
DËSHMITARËT
Për zbatimin e kësaj kontrate dhe dyshimet për dallavere, në aktakuzën e Prokurorisë kanë folur edhe disa dëshmitarë. Valon Hetemi në cilësinë e zyrtarit ligjor të Ministrisë, kishte treguar për përmbajtjen e materialeve që ishin kontraktuar nga kompania. “Dëshmitari përgjigjet se më vonë kishin marrë informacion se në emër të shërbimeve të prezantuara dhe të paguaa nga MIE, ishin përfshirë edhe shërbime të cilat nuk kanë qenë në harmoni me kontratën, e të cilat ishin shërbime për mbulimin e fushatës zgjedhore të Dhurata Hoxhës. Për këtë arsye, me email aid he anëtarët e tjerë të komisionit, i ishin drejtuar sekretarit duke i kërkuar të largohen nga komisioni”.
Anëtarja e komisionit për këtë tender njëherësh zyrtare e Prokurimit në MIE, Blerta Verbovci, ka thënë se nuk ka dijeni për materialet që ishin realizuar nga kjo kontratë. Ajo ka treguar pse ishin shtuar kritere shtesë në tender, duke u përzgjedhur pastaj fituese kompania më e shtrenjtë. “Ka qenë ideja e drejtorit të Prokurimit Fitim Mustafa i cili në fakt është munduar me më shti me shkruajt emailin për ta kërkuar kriterin shtesë, por unë e kam refuzuar e pastaj ai e ka shkruajtur emailin vet. Edhe i ka thënë se nëse nuk i plotëson këtë kriter, je i eleminuar”
Për promovimin e ish-ministres Hoxha me tenderin e paguar nga Ministria, kishte dyshuar dëshmitari tjetër Urim Salihu, njëherësh anëtar i komisionit për pranimin e shërbimeve nga kjo kontratë. “Shërbimet për të cilat komisioni dyshonte se janë shtuar në dosje, kishin të bënin me promovimin e fushatës zgjedhore të Dhurata Hoxhës. Mirëpo duke qenë se kërkesa e tyre nuk ishte aprovuar nga sekretari, kanë kërkuar nga operatori që të gjitha shërbimet t’ua pezantojë me vulë të gjitha”
Të katër të akuzuarit e kanë mohuar fajësinë para Prokurorit. Ish-ministrja Dhurata Hoxha, ka theksuar se kontrata në fjalë ishte realizuar edhe me kërkesën e ndërkombëtarëve, dhe kishte synim t’i informojë qytetarët për proceset integruese. “Sa i përket fushatës zgjedhor në kohën kur ka kandiduar për deputete, deklaron se fushatën e ka financuar me mjete personale ku ka shpenzuar 3 mijë e 500 deri në 4 mijë euro të cilat ia ka paguar rrjetit social facebook. Deklaron se personalisht nuk ka bashëpunuar me asnjë portal dhe nuk ka paguar për ta promovuar fushatën e saj. Përmes Facebookut ka postuar video të cilat janë realizuar nga ekipi i PDK-së”, thuhet në aktakuzë.
I akuzuar në këtë rast është edhe Ekrem Tahiri, bashkëpronar dhe drejtor i kompanisë PR Solutions. Ai para Prokurorit ka thënë se kontratën e kanë zbatuar në përpikmëri. “Lidhur me atë nëse kompania ishte përfshirë në promovimin e fushatës zgjedhore të Dhurata Hoxhës, meqnëse në atë periudhë kohore ishte koha e zgjedhjeve, deklaron se nuk kanë punuar në fushatën e saj, por se ia kanë bërë një video Dhurata Hoxhës. Për këtë video, deklaron se kabineti i ministres i kishte kërkuar të shkojnë dhe ta xhirojnë dhe të njëjtën e kanë realizuar”.
Akuzat i kanë mohuar edhe dy të akuzuarit e tjerë Gëzim Dushi e Fitim Mustafa.
Kjo është aktakuza e dytë ndaj Dhurata Hoxhës, ku dyshohet për keqpërdorim të detyrës zyrtare. Një tjetër proces gjyqësor ka nisur ndaj saj, në lidhje me kontratat e lobimit.
