Disa nga ngjarjet, njerëzit dhe datat më me ndikim në historinë botërore që kanë shënuar ditën e sotme, 14 mars.
14 mars 1827 – Në kohën e Sulltan Mahmutit II u themelua fakulteti i parë i mjekësisë në historinë turke me emrin Shkolla Perandorake e Mjekësisë (Mekteb-i Tıbbiye-i Şahane). Mjekët e parë nga ky fakultet u diplomuan në vitin 1843. Kur 4 të diplomuar nga Shkolla Perandorake e Mjekësisë kaluan provimin e aftësisë profesionale, që u zhvillua në Vjenë në vitin 1848, diploma e këtij fakulteti nisi të vlerësohet e barasvlershme me atë të fakulteteve të mjekësisë në Evropë. Në vitin 1919, përvjetori i hapjes së Shkollës Perandorake të Mjekësisë filloi të shënohet si Dita e Mjekëve. Një vendim i tillë u mor pasi bluzat e bardha, nën udhëheqjen e studentit Hikmet Boran, asokohe dolën zyrtarisht kundër fuqive imperialiste. Edhe sot 14 marsi vazhdon të festohet në Turqi si Dita e Mjekëve.
14 mars 1883 – Filozofi dhe ekonomisti politik gjerman, Karl Marks, teoricien i ideologjisë së socializmit shkencor dhe autor i Kapitalit (Das Kapital), një prej veprave më të rëndësishme klasike të ekonomisë botërore, vdiq në Londër si person “pa shtetësi” në moshën 65-vjeçare.
14 mars 1919 – Plani i ushtrisë greke për të pushtuar Izmirin u miratua nga Kryeministri britanik – David Lloyd George, Kryeministri francez – Georges Clemenceau, Kryeministri italian – Vittorio Emanuele Orlando dhe Presidenti i Shteteve të Bashkuara të Amerikës – Woodrow Wilson.
14 mars 2018 – Fizikani, kozmologu, astronomi, teoricieni dhe shkrimtari britanik, Stephen Hawking, u nda nga jeta në moshën 76-vjeçare. I konsideruar si një prej shkencëtarëve më të rëndësishëm në botë sidomos për punimet e titulluara “Shpërthimi i Madh”, “Vrimat e Zeza” dhe “Mekanika e Kuantumit”, Hawking i vazhdoi kërkimet shkencore edhe pse humbi aftësinë e të folurit për shkak të sklerozës laterale amiotrofike (ALS). Veprat e tij janë përkthyer në 40 gjuhë të ndryshme.
